నిబంధనలు పాటించకపోతే కళాశాలలపై చర్యలు: పురంధేశ్వరి

హైదరాబాద్‌: నిబంధనలు పాటించని ఇంజనీరింగ్‌ కళాశాలలపై న్యాయపరమైన చర్యలు తీసుకోనున్నట్లు కేంద్ర మావనవనరుల శాఖ సహాయ మంత్రి దగ్గుబాటి పురంధేశ్వరి తెలిపారు. దేశంలో ఎక్కడా లేని విధంగా రాష్ట్రంలో ఇంజనీరింగ్‌ కళాశాలలు పుట్టుకొస్తున్నాయని ఆమె అన్నారు. విద్యా సంవత్సరంలోగా ప్రారంభించాలనే ఉద్దేశంతో చాలా కళాశాలల యాజమన్యాలు నిబంధనలను తుంగలో తొక్కుతున్నారని ఆమె సోమవారం అన్నారు.

కళాశాలల గుర్తింపు విషయంలో అవకతవకలు జరుగుతున్నాయనే ఆరోపణలు వచ్చినందున ఏఐసీటీని బాధ్యతల నుంచి తప్పించామన్నారు. నేషనల్‌ కౌన్సిల్‌ ఫర్‌ హయ్యర్‌ ఎడ్యుకేషన్‌ ఆధ్వర్యంలో నేషనల్‌ నాలెడ్జి కమిషన్‌తో పాటు యశ్‌ పాల్‌ కమిటీ సూచనల మేరకే భారతీయ విద్యావిధానంలో అనేక మార్పులు చేయనున్నట్లు వెల్లడించారు. ఇందులో భాగంగా సీబీఎస్‌ఈ పాఠశాలల్లో ఈ ఏడాది నుంచే బోర్లు పరీక్షలను రద్దు చేస్తున్నట్లు తెలిపారు.