సూర్యాపేటలో హరికృష్ణను అడ్డుకున్న తెలంగాణవాదులు

నల్లగొండ: తెలుగుదేశం పార్టీ రాజ్యసభ సభ్యుడు నందమూరి హరికృష్ణను నల్లగొండ జిల్లా సూర్యాపేటలో తెలంగాణవాదులు శుక్రవారం అడ్డుకున్నారు. తన బంధువుల ఇంట్లో భోజనం చేయడానికి ఆగినప్పుడు ఈ సంఘటన చోటు చేసుకుంది. ఈ సమయంలో తెలంగాణవాదులకు, తెలుగుదేశం పార్టీ కార్యకర్తలకు మధ్య వాగ్వివాదం చెలరేగింది. సమైక్యవాదాన్ని విడనాడాలని తెలంగాణవాదులు హరికృష్ణను డిమాండ్ చేశారు.

తన తండ్రి ఎన్టీఆర్ సమైక్యవాది అని, అయితే తాము ప్రజాభిప్రాయానికి కట్టుబడతామని ఆయన చెప్పారు. కదిరి సంఘటనతో తమ పార్టీపై బురద చల్లేందుకు ప్రయత్నాలు జరుగుతున్నాయని ఆయన అన్నారు. మహిళలకు తెలుగుదేశం పార్టీయే గౌరవం కలిగించిందని ఆయన అన్నారు. కాంగ్రెసు జలయజ్ఞాన్ని ధనయజ్ఞంగా మార్చిందని ఆయన విమర్సించారు.