వాదనలు వినడానికి విజయవాడకు 12న శ్రీకృష్ణ కమిటీ

విజయవాడ: రాష్ట్రం విభజనపై ఏర్పాటైన శ్రీకృష్ణకమిటీ ఈ నెల 12వ తేదీన నగరానికి రానుంది. శ్రీకృష్ణ, వికె దుగ్గల్, రణబీర్‌ సింగ్, రవిదింగ్రా, రాజీవ్‌ శర్మ ఈ బృందంలో ఉంటారు. కమిటీ సభ్యులు 12 తేదీ మధ్యాహ్నం గన్నవరం విమానాశ్రయానికి చేరుకుంటారు. అక్కడ నుంచి రోడ్డుమార్గంలో విజయవాడ చేరుకుంటారని రెవెన్యూ డివిజన్ అధికారి కె ధర్మారెడ్డి చెప్పారు. అదే రోజు సాయంత్రం 4.30 నుంచి ఐదు గంటల వరకు సంబంధిత అధికారుల నుంచి సమాచారం సేకరిస్తారు. ఐదు గంటల తరువాత అభ్యర్థనలు స్వీకరిస్తారు.

కమిటీ ఎదుట తమ వాదనలు వినిపించదలచుకున్న వారు ఈనెల 10వ తేదీ సాయంత్రం ఐదు గంటలలోపు తమ పేర్లను సబ్‌కలెక్టర్ కార్యాలయంలోని పాలనాధికారి వద్ద నమోదు చేయించుకోవాలని ధర్మారెడ్డి సూచించారు. కమిటీ ఎదుట హాజరయ్యేందుకు ఒక్కో సంస్థ నుంచి ఇద్దరికి మాత్రమే అవకాశం ఉంటుంది. విషయంపై ఆసక్తి ఉన్నవ్యక్తులు, సంస్థలు, అసోసియేషన్లు, రాజకీయ పార్టీలు, ప్రతినిధులు, పత్రికా ప్రతినిధులు కృష్ణకమిటీ ఎదుట పాల్గొనవచ్చు.