వైయస్ జగన్ కు షోకాజ్ నోటీసు వార్తలు ఉత్తవే: వీరప్ప మొయిలీ

న్యూఢిల్లీ: తమ పార్టీ కడప పార్లమెంటు సభ్యుడు వైయస్ జగన్ కు షోకాజ్ నోటీసు ఇచ్చినట్లు వచ్చిన వార్తలను కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ ఖండించారు. ఆ వార్తలు నిరాధారమైనవని ఆయన సోమవారం మీడియా ప్రతినిధులతో అన్నారు. ముఖ్యమంత్రి కె. రోశయ్యపై చేసిన వ్యాఖ్యలకు గాను జగన్ కు షోకాజ్ నోటీసు ఇచ్చినట్టు జాతీయ మీడియాలో వార్తలు వచ్చాయి. ఈ వార్తలు రాష్ట్రమంతా వ్యాపించాయి.

జగన్ కు షోకాజ్ నోటీసు ఇచ్చినట్లు వచ్చిన వార్తలపై రాష్ట్రంలో జగన్ అభిమానులు తీవ్రంగా మండిపడ్డారు. కాంగ్రెసు పార్టీ తీవ్రంగా నష్టపోతుందని, పార్టీ కనుమరుగై పోతుందని మండిపడ్డారు. కాగా, జగన్ వ్యవహారంపై వీరప్ప మొయిలీ ఆరా తీస్తున్నారు. జగన్ వ్యాఖ్యలను క్షుణ్నంగా పరిశీలిస్తున్నారు.