తెలంగాణ ఉప ఎన్నికలు: కెసిఆర్ వర్సెస్ సబితా ఇంద్రారెడ్డి

కరీంనగర్: తెలంగాణ ఉప ఎన్నికల ప్రచారంలో తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావుకు, హోం మంత్రి సబితా ఇంద్రారెడ్డికి మధ్య మాటల యుద్ధం సాగుతోంది. సబితా ఇంద్రారెడ్డిపై కెసిఆర్ తీవ్రమైన వ్యాఖ్యలు చేశారు. దాన్ని హోం మంత్రి సబితా ఇంద్రారెడ్డి తిప్పికొట్టారు."సబితమ్మ కాదు సన్నాసియమ్మ" అంటూ కెసిఆర్ శుక్రవారం రాత్రి తన ఎన్నికల ప్రచార కార్యక్రమంలో విమర్శించారు. పోలీసుల చేతుల్లో వందలమంది విద్యార్థులు నానా ఇక్కట్లు పడుతుంటే ఈ సన్నాసియమ్మ గుడ్లప్పగించి చూస్తూ ఉన్నారని మండిపడ్డారు. రాష్ట్రానికి హోంమంత్రిగా ఆమె పనికి రారని అన్నారు. తెలంగాణా ప్రాంతానికి చెందినవారైనప్పటికీ ఇటువంటి మంత్రి మనకు ఉన్నా ఒరిగేదేమీ లేదన్నారు.

కెసిఆర్ వ్యాఖ్యలపై కాంగ్రెస్ పార్టీ మండిపడింది. ఆయన నోటికి తాళం వేయాలని ఎన్నిల సంఘానికి కాంగ్రెస్ ఫిర్యాదు చేసింది. కాగా, నిజామాబాద్ ఎన్నికల ప్రచారంలో సబితా ఇంద్రారెడ్డిపై కెసిఆర్ పై తీవ్రంగా మండిపడ్డారు. వైయస్ పేరు చెప్తే కెసిఆర్ గుండెల్లో భయం పుడుతుందని, అందుకే తమను కెసిఆర్ సన్నాసులని అంటున్నారని ఆమె శనివారం అన్నారు.