వరదల బీభత్సంతో జలదిగ్బంధంలో పలు గ్రామాలు

శ్రీకాకుళం/ఆదిలాబాద్: ఎగువన కురుస్తున్న భారీవర్షాలతో శ్రీకాకుళం జిల్లాలోని వంశధార, నాగావళి నదులు ఉద్ధృతంగా ప్రవహిస్తున్నాయి. వంశధారలోకి ఇన్‌ ఫ్లో 43 వేల క్యూసెక్కులుగా ఉంది. నదుల్లో నీటిమట్టం పెరుగుతుండడంతో పలు ప్రాంతాలు జలదిగ్బంధంలో చిక్కుకున్నాయి. కొత్తూరు మండలం పెనుగోటివాడ గ్రామానికి బాహ్యప్రపంచంతో సంబంధాలు తెగిపోయాయి. సముద్రంలో చేపల వేటకు వెళ్లి గల్లంతైన బారువకొత్తూరు, సీహెచ్‌ గొల్లగండికి చెందిన ఐదుగురు మత్స్యకారుల కోసం గాలింపు చర్యలు కొనసాగుతున్నాయి. నావీ హెలికాప్టర్లతో ఈరోజు గాలింపు చేపట్టనున్నట్లు జిల్లా కలెక్టర్‌ శ్రీకాంత్‌ తెలిపారు.

వాయువ్య బంగాళాఖాతంలో ఏర్పడిన అల్పపీడనం కారణంగా జిల్లాలో భారీ వర్షాలు కురుస్తున్నాయి. మంచిర్యాల, కాగజ్‌ నగర్‌, నిర్మల్‌, బెల్లంపల్లి తదితర ప్రాంతాలు పూర్తిగా జలమయమయ్యాయి. వేమనపల్లి మండలంలో గొర్లపల్లి, బతుకమ్మ వాగులు పొంగిపొర్లుతున్నాయి. 25 గ్రామాలు జలదిగ్బంధంలో చిక్కుకున్నాయి. వరద ఉద్ధృతికి బతుకమ్మవాగు కాజ్‌ వే కొట్టుకుపోయింది. వేల ఎకరాల్లో పంటలు నీటమునిగాయి. బెజ్జూరు మండలంలో కృష్ణపల్లి వాగు పొంగి 10 గ్రామాలకు రాకపోకలు నిలిచిపోయాయి.