తూర్పు గోదావరి జిల్లా కాకినాడ బీచ్ లో నాలుగు మృతదేహాలు

కాకినాడ: తూర్పు గోదావరి జిల్లా కాకినాడ బీచ్ లో శుక్రవారం ఉదయం నాలుగు మృతదేహాలు కనిపించాయి. సముద్రంలోంచి ఆ వాహనాలు కొట్టుకువచ్చినట్లు భావిస్తున్నారు. శవాలు పూర్తిగా ఉబ్బి ఉన్నాయి. మృతుల్లో ఓ 50 ఏళ్ల మహిళ, మరో 30 ఏళ్ల మహిళ, ఇద్దరు మగ పిల్లలున్నారు. వారి ఆనవాళ్లు ఏమిటనేది తెలియడం లేదు.

పోలీసులు మృతదేహాలను స్వాధీనం చేసుకున్నారు. వారి నోటి నుంచి నురగలు వచ్చిన దాఖలాలున్నాయి. అందువల్ల వారు ముందు పురుగుల మందు తాగి సముద్రంలో దూకినట్లు అనుమానిస్తున్నారు. అయితే, వారెందుకు ఆత్మహత్య చేసుకున్నారు, వారెవరు అనే విషయాలు తెలియడం లేదు. వారిని గుర్తించేందుకు పోలీసులు ప్రయత్నిస్తున్నారు.