వైయస్ ఆత్మను డిఎల్, జెసి పీక్కు తింటున్నారు: అంబటి రాంబాబు

తిరుపతి: మరణించిన వైయస్ రాజశేఖర రెడ్డి ఆత్మను కాంగ్రెసు శాసనసభ్యులు జెసి దివాకర్ రెడ్డి, డిఎల్ రవీంద్రారెడ్డి పీక్కు తింటున్నారని కాంగ్రెసు బహిష్కృత నేత అంబటి రాంబాబు వ్యాఖ్యానించారు. టిటిడి అక్రమాల ఆరోపణలపై విచారణ జరిపించాలని డిమాండ్ చేస్తూ ఆమరణ నిరాహార దీక్ష చేస్తున్న టిటిడి మాజీ చైర్మన్ భూమన కరుణాకర్ రెడ్డిని ఆయన శనివారం పరామర్శించారు. మంత్రి పదవి దక్కక ఒక్కరు, ఉన్న మంత్రి పదవి ఊడిపోయి మరొక్కరు దయ్యాలై మరణించిన తర్వాత కూడా వైయస్ ను వదలడం లేదని, వైయస్ ఆత్మను పీక్కు తింటున్నారని ఆయన అన్నారు.

వైయస్ రాజశేఖర రెడ్డి వ్యక్తిత్వాన్ని ధ్వంసం చేసేందుకు వారిద్దరు ప్రయత్నిస్తున్నారని ఆయన అన్నారు. రాయలసీమలో పులులు, సింహాలు పుడుతాయంటారని, అయితే ఈ రెండు నక్కలు పుట్టాయని ఆయన అన్నారు. అయితే రాంబాబు డిఎల్, జెసిల పేర్లు ప్రస్తావించలేదు. టిటిడి అక్రమాలపై వచ్చిన ఆరోపణలపై విచారణ జరిపించాలని ఆయన ప్రభుత్వాన్ని డిమాండ్ చేశారు. నిర్దోషిత్వాన్ని నిరూపించుకోవడానికి కరుణాకర్ రెడ్డికి అవకాశం ఇవ్వాలని, తిరుమల అభివృద్ధికి ఎంతో కృషి చేసిన కరుణాకర్ రెడ్డిపై విమర్శలు చేస్తున్నారని ఆయన అన్నారు.