వైయస్ జగన్ ఓదార్పు యాత్ర తీరు మారుతుందా?

న్యూఢిల్లీ: కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర తీరు మారుతుందనే మాట వినిపిస్తోంది. ఓదార్పు యాత్ర దండయాత్రలా ఉండకూడదని, బాధితులను ఒక్క దగ్గరికి చేర్చి సహాయం అందించాలని పార్టీ అధిష్టానం చెబుతోంది. అయితే, అందుకు జగన్ అంగీకరించడం లేదు. దాంతో జగన్ ఓదార్పు యాత్రను అధిష్టానం వ్యతిరేకిస్తోంది. జగన్ ఓదార్పు యాత్ర తీరు మారుతుందని కాంగ్రెసు పార్లమెంటు సభ్యుడు సబ్బం హరి అంటున్నారు. అయితే, ప్రకాశం జిల్లా ఓదార్పు యాత్ర తర్వాత జరిగే యాత్రల తీరును జగన్ మార్చుకుంటారని ఆయన శనివారం చెప్పారు.

ఓదార్పు యాత్ర విషయంలో తప్ప వైయస్ జగన్ ఎప్పుడు కూడా అధిష్టానాన్ని ధిక్కరించలేదని ఆయన అన్నారు. వైయస్ జగన్ విషయంలో అధిష్టానం ఆగ్రహాన్ని తగ్గించడానికి, సయోధ్య కుదర్చడానికి సబ్బం హరి మధ్య మధ్యలో రంగప్రవేశం చేస్తున్నారు. పార్లమెంటు సభ్యుడు సందీప్ దీక్షిత్ తో జగన్ చర్చల సందర్భంలో కూడా సయోధ్య కుదురుతుందని ఆయన ప్రకటించారు. కానీ అది సాధ్యపడలేదు. జగన్ పై అధిష్టానం తీవ్రతను తగ్గించడానికే సబ్బం హరి తాజాగా ఆ ప్రకటన చేశారని భావిస్తున్నారు.