రోశయ్య ప్రభుత్వాన్ని దించేందుకు పురంధేశ్వరి దంపతుల కుట్ర?

ఒంగోలు: తమ పార్టీ కడప పార్లమెంటు సభ్యుడు వైయస్ జగన్ ఓదార్పు యాత్రపై రాజకీయం చేస్తున్నారంటూ కేంద్ర మంత్రి దగ్గుబాటి పురంధేశ్వరి, దగ్గుబాటి వెంకటేశ్వర రావు దంపతులపై కాంగ్రెసు ఎమ్మెల్సీ జూపూడి ప్రభాకర రావు ధ్వజమెత్తారు. ముఖ్యమంత్రి రోశయ్య ప్రభుత్వాన్ని దించేందుకు దగ్గుబాటి దంపతులు కుట్ర చేస్తున్నారని ఆయన ఆరోపించారు. దగ్గుబాటి దంపతుల కోవర్టు ఆపరేషన్ విషయం ముఖ్యమంత్రి రోశయ్యకు తెలిసినట్లు లేదని ఆయన శనివారం మీడియా ప్రతినిధుల సమావేశంలో వ్యాఖ్యానించారు.

రాష్ట్ర రాజకీయాలపై అవగాహన లేని దగ్గుబాటి వెంకటేశ్వర రావు ఢిల్లీ వెళ్లి వైయస్ జగన్ పై కుయుక్తులు పన్నుతున్నారని ఆయన విమర్శించారు. ఎవరు అవునన్నా, కాదన్నా జగన్ చరిష్మా ఉన్న నాయకుడని ఆయన కొనియాడారు. రాజకీయాలు అంటే ఏం తెలుసన్న రాజ్యసభ సభ్యుడు వి. హనుమంత రావు వ్యాఖ్యలపై ఆయన నిప్పులు చెరిగారు. రెండు కోట్ల మంది క్రిస్టియన్లను అవమానించిన విహెచ్ క్షమాపణ చెప్పాలని ఆయన డిమాండ్ చేశారు.