సీమాంధ్ర లెక్చరర్లపై దాడి కేసులో నలుగురి అరెస్టు

హైదరాబాద్: ఉస్మానియా విశ్వవిద్యాలయంలో బీఈడీ స్పాట్ వాల్యూయేషన్ సందర్బంగా సీమాంధ్ర అధ్యాపకులపై దాడికి పాల్పడిన నలుగురు విద్యార్ధులను పోలీసులు బుధవారం ఉదయం అరెస్టు చేశారు. వీరబాబు, సైదులు, జగన్, శ్రీనివాస్‌లను అదుపులోకి తీసుకున్నారు. దీంతో అరెస్టు అయిన వారిని వెంటనే విడుదల చేయాలని ఓయూ విద్యార్ధి జేఏసీ పోలీసులను డిమాండ్ చేశారు. ఈ ఘటనలో 20 మంది విద్యార్ధులపై కేసులు నమోదు చేశారు.

నాలుగు రోజుల క్రితం ఆగస్టు 28వ తేదీన ఓయూలో బీఈడీ స్పాట్ వాల్యూయేషన్ నిర్వహిస్తున్న కేంద్రం వద్ద ఆందోళనకు దిగిన విద్యార్థు లు పరీక్షా పత్రాలు దిద్దేందుకు వచ్చిన సీమాంధ్ర ప్రాంత అధ్యాపకులపై దాడి చేశారు. వారిని తరిమికొట్టారు. "సీమాంధ్ర అధ్యాపకులు వాల్యూయేషన్ చేయరాదు, వారి వాల్యూయేషన్‌లో మోసం, కుట్ర ఉంది. ఇక్కడి విద్యార్థులపై కక్ష పెట్టుకున్నారు, తెలంగాణ విద్యార్థుల పరీక్షా పత్రాలను తెలంగాణ అధ్యాపకులే దిద్దాలంటూ పెద్ద ఎత్తున నినాదాలు చేసిన విషయం విదితమే.