జగన్ ఫ్యాక్టర్: గడువు కన్నా ముందే తెలంగాణపై నిర్ణయం

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర వల్ల తలెత్తిన పరిణామాల నేపథ్యంలో గడువు కన్నా ముందే కాంగ్రెసు నేతృత్వంలోని యుపిఎ ప్రభుత్వం తెలంగాణపై నిర్ణయం తీసుకునే అవకాశాలున్నాయని అంటున్నారు. తెలంగాణ ఏర్పాటు ద్వారా వైయస్ జగన్ రాజకీయాలను సీమాంధ్రకు మాత్రమే పరిమితం చేయాలనే ఉద్దేశంతో కాంగ్రెసు అధిష్టానం ఉన్నట్లు చెబుతున్నారు. తెలంగాణలో తెలుగుదేశం పార్టీ దాదాపుగా తుడిచిపెట్టుకుపోయిందని కాంగ్రెసు నాయకత్వం భావిస్తోంది. తెలంగాణ రాష్ట్రం ఇస్తే తెలంగాణ రాష్ట్ర సమితి (తెరాస)ని కూడా దగ్గర చేసుకోవచ్చుననే ఆలోచనలో ఉన్నట్లు చెబుతున్నారు. అందువల్ల డిసెంబర్ 31వ తేదీ దాకా కూడా కేంద్ర ప్రభుత్వం తెలంగాణపై నిర్ణయం కోసం నిరీక్షించకపోవచ్చునని అనుకుంటున్నారు.

గడువు కన్నా ముందే తెలంగాణపై గడువు కన్నా ముందే కేంద్రం నిర్ణయం తీసుకోవచ్చుననే ప్రచారానికి జస్టిస్ శ్రీకృష్ణ ప్రకటన కూడా బలం చేకూరుస్తోంది. గడువు కన్నా ముందే తాము నివేదిక సమర్పిస్తామని ఆయన బుధవారం మీడియా ప్రతినిధుల సమావేశంలో అన్నారు. ఆయన బుధవారం వరంగల్ జిల్లాలో పర్యటించి ప్రజాభిప్రాయం తీసుకున్నారు. గతంలో కూడా శ్రీకృష్ణ కమిటీ సభ్య కార్యదర్శి వికె దుగ్గల్ కూడా ఇదే అభిప్రాయాన్ని వ్యక్తం చేశారు. శ్రీకృష్ణ కమిటీ నివేదిక తెలంగాణ రాష్ట్ర ఏర్పాటుకు అనుకూలంగా ఉంటుందని కూడా భావిస్తున్నారు. తెరాస అధ్యక్షుడు కె. చంద్రశేఖర రావు నేతృత్వంలో నడుస్తున్న తెలంగాణ గుండె చప్పుడు రాజ్ న్యూస్ అదే అభిప్రాయాన్ని వ్యక్తం చేసింది. శ్రీకృష్ణ బుధవారం వ్యక్తం చేసిన అభిప్రాయానికి ఆ విధమైన ఆర్థాన్నిచ్చి రాజ్ న్యూస్ వ్యాఖ్యానించింది.