వైయస్ జగన్ ప్రకటన: హైకమాండ్ కు ఎత్తిపొడుపులు

హైదరాబాద్: వైయస్ రాజశేఖర రెడ్డి మరణానికి షాక్ కు గురై మరణించినవారి కుటుంబాలకు ఆర్థిక సాయం అందించాలని ఎఐసిసి నిర్ణయంపై కాంగ్రెసు కడప పార్లమెంటు సభ్యుడు వైయస్ జగన్ ప్రకటన చేశారు. ఓ వైపు పార్టీ అధ్యక్షురాలు సోనియా గాంధీకి కృతజ్ఞతలు చెబుతూనే అధిష్టానాన్ని ఎత్తిపొడిచారు. తన తీరు మారదని మరో సారి చెప్పకనే చెప్పారు. మంగళవారం సాయంత్రం ఆయన ఓ ప్రకటన చేశారు. ఓదార్పు అంటే కేవలం బాధిత కుటుంబాలకు ఆర్థికసాయం అందించడమే కాదని, ఆర్థికసాయం ఓదార్పులో ఒక అంశం మాత్రమేనని ఆయన స్పష్టంచేశారు. కుటుంబంతో కలిసి తాను పర్యటనలో ఉన్నందున పత్రికల ద్వారా విషయం తెలుసుకున్నానని, ఏఐసీసీ ప్రకటన రాష్ట్రంలోని పార్టీ శ్రేణులు, వైఎస్‌ అభిమానులకు ఎంతో ఊరటనిచ్చిందని అన్నారు. మహానేత మరణాన్ని తట్టుకోలేక కొందరు ఆత్మహత్యలు చేసుకుంటే..మరికొందరు షాక్‌ తో, వేదనతో, గుండెపోటుతో మరణించారని, వారందరికీ కూడా ఆర్థికసాయం వర్తింపచేసి ఉంటే మరింత బాగుండేదని వ్యాఖ్యానించారు.

తన తండ్రి కోసం ప్రాణాలర్పించిన ఆత్మబంధువుల కుటుంబాలను వారి ఇంటికెళ్ళి పలకరించడం, ఆదుకోవడం కనీస ధర్మంగా భావించానని, ఇదే విషయాన్ని నల్లకాలువ వద్ద సభలో ప్రకటించానని ఆయన గుర్తు చేశారు. "కష్టాల్లో ఉన్న వారి కన్నీళ్ళు తుడవడం, వారికి భరోసా ఇవ్వడం ముఖ్యం. అది మన సంప్రదాయం. దీన్ని అనుసరించే నేను ఓదార్పు యాత్ర ప్రారంభించాను. మధ్యలో కొందరు ఈ పవిత్ర కార్యక్రమాన్ని అవహేళన చేయడమే కాదు, మరణాలన్నీ అవాస్తవమని వ్యాఖ్యానించిన నేపథ్యంలో ఇప్పుడు పార్టీ అధినాయకత్వం నిర్ణయం ఓదార్పు ఆవశ్యకతను, అందులోని నిజాయితీని గుర్తించినట్లయింది" అని జగన్‌ తన ప్రకటనలో అభిప్రాయపడ్డారు. పార్టీ ఎమ్మెల్యేలు, ఎంపీలు, నాయకులు కూడా యాత్రలో తనతో పాటు వచ్చి, బాధిత కుటుంబాలతో పరిచయం ఏర్పరుచుకుని, సమస్యలు తెలుసుకుంటే వారికి ఇంకా మంచి చేయగలుగుతామని అన్నారు. దీనివల్ల మొత్తం కార్యక్రమానికి పరిపూర్ణత చేకూరుతుందని పేర్కొన్నారు. అది దివంగత నేతకు నిజమైన నివాళి అవుతుందని, తద్వారా పార్టీ శ్రేణుల్లో కూడా నూతనోత్తేజం నింపినట్లవుతుందని అన్నారు.