కేంద్రం, తెలంగాణ భవన్ కు సలాం కొట్టి తెలంగాణ రాసిస్తుందన్న ధీమా కెసిఆర్ ది..!

హైదరాబాద్: తెలంగాణ రాష్ట్ర సమితి అధ్యక్షుడు కె చంద్రశేఖర రావు మాట్లాడుతూ ప్రస్తుతం తమ పార్టీకి చెందిన ఎమ్మేల్యేలు 10 మంది మాత్రమే ఉండడంతో పార్టీకి తగినంత బలం లేదని, కనుక రాజకీయంగా ఒత్తిడి సాధ్యం కాదని తెలిపారు. తెలంగాణ రావాలంటే నాలుగు కోట్ల మంది తెలంగాణ ప్రజలు ఏకమై ఒక తాటిపై నిలిచి పాలనా కార్యర్రమాలను స్తంభింపజేస్తే, కేంద్ర ప్రభుత్వం తెలంగాణ భవన్ కు సలాం కొట్టి తెలంగాణ రాష్ట్రాన్ని రాసిస్తుందని కెసిఆర్ తెలియజేశారు. తెలంగాణ జాతి విముక్తి కోసం మనం చేస్తున్నపోరాటంలో ఇప్పుడున్న వారిని నమ్ముకుంటే తెలంగాణ ఎప్పటికీ రాదని, కనుక ప్రజలే నడుం బిగించి ఒక్కసారిగా జై తెలంగాణ అంటే మన రాష్ట్రం మనకు ఖచ్చితంగా వస్తుందని కెసిఆర్ అన్నారు.

డిసెంబరు 31 వరకూ వేచి చూద్దామని, అప్పటికీ కేంద్రం తెలంగాణ రాష్ట్ర ఏర్పాటుకు గ్రీన్ సిగ్నల్ ఇవ్వకుంటే, గాంధీజీ బాటలో పెద్ద ఎత్తున సహాయ నిరాకరణ ఉద్యమం చేసేందుకు ప్రజలంతా సిద్ధంగా ఉండాలని, ఎక్కడి వారు అక్కడే పాలనను స్తంభింపజేసి ఒక్క బస్సును, రైలును కూడా కదలనివ్వకూడదని, షాపులు తెరవకూడదని, ఉద్యోగులు తమ విధులకు హాజరు కాకుండా మొత్తం అన్ని కార్యక్రమాలు బంద్ అయితేనే మన రాష్ట్రం మనకు వస్తుందని కెసిఆర్ ప్రజలకు పిలుపునిచ్చారు.