హెచ్ సిఎపై కన్ను: కెసిఆర్ కూతురు కవిత ఫుల్ స్వింగ్

హైదరాబాద్‌: హైదరాబాద్ క్రికెట్ సంఘం (హెచ్ సిఎ)పై తెలంగాణ రాష్ట్ర సమితి అధ్యక్షుడు కె. చంద్రశేఖర రావు కూతురు, తెలంగాణ జాగృతి అధ్యక్షురాలు కల్వకుంట్ల కవిత కన్ను పడింది. హెచ్‌సీఏ లో శివలాల్‌యాదవ్‌ ఆధిపత్యానికి గండి కొట్టాలని ఆమె ప్రయత్నిస్తున్నారు. హెచ్‌సీఏ వ్యవహారాలపై దృష్టిసారించిన కవిత మున్ముందు ఇక్కడి క్రికెట్‌ పెద్దలను ఢీకొట్టేందుకు సన్నద్ధమవుతున్నారు. ఇందుకు గాను ఆమె క్రికెట్ సంఘాల్లో కీలక పాత్ర పోషిస్తున్న శరద్ పవార్, అరుణ్ జైట్లీతో ఆమె భేటీ అయినట్లు ఓ ప్రముఖ దినపత్రిక వార్తాకథనాన్ని ప్రచురించింది. హెచ్ సిఎలో పాగా వేసేందుకు మంత్రులు కోమటిరెడ్డి వెంకటరెడ్డి, శ్రీధర్ బాబు వంటివారు విఫలప్రయత్నాలు చేశారు. శివలాల్ ఆధిపత్యాన్ని దెబ్బ కొట్టేందుకు పార్లమెంటు సభ్యుడు జి. వివేక్, కాసాని జ్ఞానేశ్వర్ చేసిన ప్రయత్నాలు కూడా ఫలించలేదు. ఎక్కువ క్రికెట్ క్లబ్బులు శివలాల్ యాదవ్ చేతిలోనే ఉన్నాయి. దీంతో ఆయనను ఓడించడం సాధ్యం కావడం లేదు.

శివలాల్‌ ఆధ్వర్యంలోని హెచ్‌సీఏతో తెలంగాణలో క్రికెట్‌ అభివృద్ధి జరగడం లేదని, ఇక్కడి క్రికెటర్లకు అవకాశాలు దక్కడం లేదని తెరాస నేతలు ఎప్పట్నుంచో ఆరోపణలు గుప్పిస్తున్నారు. ఈ నేపథ్యంలో ఓ తెరాస నేత ఆధ్వర్యంలో తెలంగాణ క్రికెట్‌ సంఘాన్ని (టీసీఏ) కవిత నమోదు చేయించారు. ఈ సంఘానికి గుర్తింపు ఇవ్వాల్సిందిగా కోరుతూ కేంద్ర మంత్రి, ఐసీసీ అధ్యక్షుడు శరద్‌పవార్‌ను, బీసీసీఐ ఉపాధ్యక్షుడు అరుణ్‌ జైట్లీని కవిత బృందం కలిసింది. టీసీఏకు గుర్తింపు తెచ్చుకోవడం అంత సులభం కకాదని భావించిన కవిత నేరుగా హెచ్‌సీఏలోనే అడుగుపెట్టాలని నిర్ణయించుకున్నట్లు సమాచారం. కొత్తగా క్లబ్బులు ఏర్పాటు చేయాలని భావిస్తున్నారు. ఇందుకోసం తెలంగాణలోని 119 నియోజయకవర్గాల నుంచి ఒక్కో క్లబ్‌ను ఏర్పాటు చేయనున్నారు. ఈ విషయమై శాసనసభ్యులతో కవిత మంతనాలు జరుపుతున్నట్లు తెలిసింది. క్రికెట్‌ అభివృద్ధి కోసం జిల్లా కలెక్టర్‌ సహకారంతో ప్రతీ నియోజకవర్గంలో మైదానానికి కొంత స్థలం తీసుకోవాలని నిర్ణయించారు. స్థానిక శాసనసభ్యుడి సారథ్యంలో క్లబ్‌ను ఏర్పాటు చేసి హెచ్‌సీఏ గుర్తింపు కోసం దరఖాస్తు చేయాలని భావిస్తున్నారు. వాటికి గుర్తింపు సాధించడానికి అవసమైతే కోర్టును కూడా ఆశ్రయించాలని ఆమె భావిస్తున్నట్లు తెలుస్తోంది.