ఎపిపిఎఎస్సీ చైర్మన్ వెంకట్రామిరెడ్డి లీకు వీరుడు: కెసిఆర్

హైదరాబాద్‌: ఏపీపీఎస్సీ ఛైర్మన్‌ వెంకట్రామిరెడ్డి లీకువీరుడని, వెంకట్రామిరెడ్డి హయాంలోనే ఎంసెట్‌ ప్రశ్నపత్రం లీకైందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు విమర్శించారు. ఇప్పుడూ వెంకట్రామిరెడ్డి తనవారికి ముందుగానే పరీక్ష పత్రాలు ఇచ్చిఉంటారని అనుమానం వ్యక్తంచేశారు. వెంకట్రామిరెడ్డిని చవట, సన్నాసి, మూర్ఖుడని అభివర్ణించారు. వెంకట్రామిరెడ్డిని ప్రభుత్వం తక్షణం పదవి నుంచి తొలగించాలని ఆయన ఆదివారం సాయంత్రం మీడియా ప్రతినిధుల సమావేశంలో డిమాండ్‌ చేశారు. ఆయన ఫిబ్రవరిలో పదవీవిరమణ చేయబోతున్నారని, ఆలోపే పోస్టులన్నీ భర్తీ చేసుకోవాలని యత్నిస్తున్నారని విమర్శించారు. ఏపీపీఎస్సీ గ్రూప్‌-1 పరీక్ష నిర్వహణ..చరిత్రలో బ్లాక్‌డేగా అభివర్ణించారు.

అది ఆంధ్రప్రదేశ్‌ పబ్లిక్‌ సర్వీస్‌ కమిషన్‌ కాదు, వెంకట్రామిరెడ్డి పబ్లిక్‌ సర్వీస్‌ కమిషన్‌గా మారిపోయిందని ఆయన వ్యాఖ్యానించారు. రాష్ట్రపతిని అగౌరవ పరిచేలా రాష్ట్రపతి ఉత్తర్వులను ప్రభుత్వం అమలు చేయడంలేదని, ఎమ్మార్వోలను, ఎండీవోలను కూడా రాష్ట్రస్థాయి పోస్టులుగా మార్చారని., హైదరాబాద్‌ లో ఎమ్మార్వో పోస్టులను అప్‌గ్రేడ్‌ చేసి ఆంధ్రవారిని తీసుకొచ్చిపెట్టారని ఆయన విమర్శించారు. మరి విశాఖపట్నం, విజయవాడ తదితర ప్రాంతాల్లో ఈ పోస్టుల్లో తెలంగాణవారిని నియమిస్తారా" అని ప్రశ్నించారు.

రాష్ట్ర ప్రభుత్వం, ఏపీపీఎస్సీ గ్రూప్‌-1 పరీక్ష నిర్వహిస్తామంటూ మొండిగా ప్రవర్తించి చతికిలపడిందని, పరీక్ష నిర్వహణలో విఫలమైందని తెరాస అధ్యక్షుడు కేసీఆర్‌ విమర్శించారు. పరీక్ష ప్రారంభమైన 10 నిమిషాల్లోపే ప్రశ్నపత్నం లీకైతే ఇక ఆ పరీక్షకు అర్థంలేదని ఆదివారం ఇక్కడ విలేఖరులతో పేర్కొన్నారు. గ్రూప్‌-1 పరీక్ష నిర్వహణలో ప్రభుత్వం పూర్తిగా విఫలమైందన్నారు. పరీక్షను వెంటనే రద్దు చేయాలని, లేదంటే మరో పోరాటం చేస్తామని కెసిఆర్ హెచ్చరించారు. బలవంతంగా పరీక్షను తెలంగాణపై రుద్దుతున్నారని విమర్శించారు. ఇప్పటికైనా ప్రభుత్వం చేసిన తప్పునకు చెంపలేసుకోవాలని డిమాండ్‌ చేశారు. "న్యాయం చేయాలని అడిగితే ఏడుగురు తెలంగాణ ప్రాంత ఎంపీలను అరెస్టు చేశారు. రాష్ట్రమంత్రులు పరీక్ష వాయిదావేయాలని కోరినా ముఖ్యమంత్రి పట్టించుకోలేదు. సహచర మంత్రుల మాటకు ముఖ్యమంత్రి విలువివ్వనప్పుడు వారు మంత్రులా లేక అటెండర్లా?" అని ప్రశ్నించారు. ముఖ్యమంత్రి, ప్రభుత్వ ప్రధాన కార్యదర్శి, డీజీపీ, ఏపీపీఎస్సీ ఛైర్మన్‌లు ఆంధ్ర ప్రాంతంవారని, తెలంగాణవారు వద్దన్నా పరీక్ష నిర్వహించడం ఆంధ్రప్రాంత జులుంకు నిదర్శనమన్నారు.

ఆదివారం జరిగిన పరీక్షపై న్యాయపరమైన పోరాటం చేస్తామని కేసీఆర్‌ తెలిపారు. ఈ పరీక్ష నిర్వహణ న్యాయస్థానం ముందు నిలువదని, ఇలాంటి పరీక్ష నిర్వహించి ముఖ్యమంత్రి, డీజీపీ, ఏపీపీఎస్సీ ఛైర్మన్‌లు ప్రపంచ రికార్డు సృష్టించారన్నారు. సోమవారం జరిగే తెలంగాణ రాజకీయ, ప్రజాసంఘాల ఐకాస సమావేశంలో తదుపరి కార్యాచరణ రూపొందిస్తామని తెలిపారు. గ్రూప్‌-1 మెయిన్స్‌ నిర్వహిస్తే ఇంతకన్నా ఎక్కువ యుద్ధకాండ జరుగుతుందని హెచ్చరించారు. విజయవాడ ఎంపీ లగడపాటి రాజగోపాల్‌ అహంకారంతో మాట్లాడుతున్నారని విమర్శించారు.