న్యాయవాదుల దీక్షకు టీఆర్ఎస్ మద్దతు: తెలంగాణలో ధర్నాలు, రాస్తారోకోలు

హైదరాబాద్: హైకోర్టులో తమ వాటాకోసం పోరాడుతున్న తెలంగాణ న్యాయవాదులకు తెలంగాణవ్యాప్తంగా అందరినుండి అనూహ్య మద్దతు లభిస్తోంది. న్యాయవాదుల నిరవధిక సమ్మె గురువారం 4వ రోజుకు చేరుకుంది. బుధవారం చలో హైకోర్టు ఉద్రిక్తతకు దారితీసిన సంగతి తెలిసిందే. కాగా 4వ రోజు న్యాయవాదుల ధర్నాకు టీఆర్ఎస్ మద్దతు ప్రకటించింది. దీంతో నల్లగొండ, మిర్యాలగూడ, సూర్యపేట, కరీంనగర్, రంగారెడ్డితోపాటు పలు జిల్లాల్లో రాస్తారోకోలు, ధర్నాలు చేస్తున్నారు. దీంతో ఆయా ప్రాంతాల్లో ట్రాఫిక్ జాం అయి, ప్రజలు తీవ్ర ఇబ్బందులు ఎదుర్కొంటున్నారు.

న్యాయవాదులకు హైకోర్టు వాటాలో 42 శాతం వచ్చే వరకు మద్దతునిస్తామని టీఆర్ఎస్ నాయకులు పేర్కొంటున్నారు. ఇంతకుముందు జరిగిన తెలంగాణ ఉద్యమాలకు తమరు న్యాయవాదులనుండి సంపూర్ణ మద్దతు లభించిందని ఇప్పుడు వారికి మేము మద్దతునివ్వకపోతే ఎలా అన్నారు. కాగా రంగారెడ్డి జిల్లా కోర్టుకు న్యాయవాదులు తాళం వేశారు. తాళం తీయడానికి యత్నించిన జడ్జికి, న్యాయవాదులకు మధ్యన ఘర్షణ చోటు చేసుకుంది. భార్గవ్ అనే న్యాయవాది ఆత్మహత్యాయత్నానికి పాల్పడ్డాడు.