వైయస్ జగన్ ఓదార్పు యాత్రలో జాగ్రత్త: పూలకు దూరం

ఒంగోలు: ఓదార్పు యాత్రలో కాంగ్రెసు కడప పార్లమెంటు సభ్యుడు వైఎస్ జగన్‌మోహన్‌రెడ్డిపై పూలు చల్లవద్దని అభిమానులకు, కార్యకర్తలకు కాంగ్రెస్ నేత వైవీ సుబ్బారెడ్డి విజ్ఞప్తి చేశారు. పూలు చల్లటం వల్ల కంటికి ఇన్‌ఫెక్షన్ మరింత ఎక్కువ అయ్యే అవకాశం ఉందని గురువారం ఆయన మీడియా ప్రతినిధులతో అన్నారు. ఓదార్పు సజావుగా సాగాలంటే జగన్ ఆరోగ్యంగా ఉండాలనే విషయాన్ని అభిమానులు గుర్తుంచుకోవాలన్నారు. మీ ప్రేమను జగనన్నను ఆశీర్వదించటం ద్వారా వ్యక్తం చేయాలని వైవీ సుబ్బారెడ్డి కోరారు.

అనారోగ్యం కారణంగా వైయస్ జగన్ కళ్లు వాచాయి. అనారోగ్యం కారణంగా ఐదు రోజులు విశ్రాంతి తీసుకోవాలని వైద్యులు సూచించారు. ఆయన గత రెండు రోజులుగా ఒంగోలులోని తన సమీప బంధువు వైవీ సుబ్బారెడ్డి నివాసంలో విశ్రాంతి తీసుకుంటున్నారు. ఈ రెండు రోజులు ఆయన ఓదార్పు యాత్రను రద్దు చేసుకున్నారు. శుక్రవారం నుంచి తిరిగి ఆయన ఓదార్పు యాత్రను సాగిస్తారు. కరచాలనం చేసే సమయంలో కూడా జగన్ కు అభిమానులు దూరంగా ఉండాలని వైద్యులు సూచించారు.