అసెంబ్లీలోకి దూసుకెళ్లేందుకు ప్రయత్నం: తీవ్ర ఉద్రిక్తత

హైదరాబాద్: తెలంగాణ విమోచన దినోత్సవం సందర్భంగా శాసనసభలో జాతీయ జెండాను ఎగురేయడానికి శుక్రవారం ఎబివిపి కార్యకర్తలు చేసిన ప్రయత్నంతో శాసనసభ వద్ద తీవ్ర ఉద్రిక్తత నెలకొంది. గన్ పార్కు నుంచి శాసనసభలోకి దూసుకెళ్లేందుకు ఎబివిపి కార్యకర్తలు ప్రయత్నించారు. వారిని అడ్డుకునేందుకు పోలీసులు ప్రయత్నించారు. ఇరు పక్షాల మధ్య తోపులాట జరిగింది. శాసనసభ ఆవరణలోని కమిటీ హాల్లో సీమాంధ్ర నాయకుల సమావేశం జరుగుతున్న నేపథ్యంలో ఈ సంఘటన జరగడం మరింత కలవరానికి కారణమైంది. ఉస్మానియా విశ్వవిద్యాలయంలోనూ తీవ్ర ఉద్రిక్త వాతావరణం నెలకొని ఉంది. సెప్టెంబర్ 17వ తేదీని ఉస్మానియా విశ్వవిద్యాలయం జెఎసి విద్రోహ దినంగా ప్రకటించింది. ఈ సందర్భంగా నల్ల జెండాలను ఎగురేయడానికి విద్యార్థులు ప్రయత్నించారు. వారి ప్రయత్నాన్ని పోలీసులు అడ్డుకునే ప్రయత్నం చేశారు.

కాగా, తెలంగాణవ్యాప్తంగా ఉద్రిక్త వాతావరణం నెలకొని ఉంది. జిల్లాల్లోని ప్రభుత్వ కార్యాలయాల్లో జాతీయ జెండాలను ఎగురేయడానికి ఎబివిపి కార్యకర్తలు ప్రయత్నిస్తున్నారు. ప్రభుత్వం అధికారికంగా ఈ కార్యక్రమాన్ని నిర్వహించడానికి అంగీకరించకపోవడంతో పోలీసులు వారి ప్రయత్నాలను అడ్డుకుంటున్నారు. వరంగల్ లో ఎబివిపి కార్యకర్తలపై పోలీసులు లాఠీచార్జీ చేశారు. హన్మకొండలో ఎబివిపి కార్యకర్తలు ర్యాలీ నిర్వహించారు. మిగతా తెలంగాణ జిల్లాల్లోనూ ఇదే వాతావరణం నెలకొని ఉంది. తెలంగాణ విమోచన దినోత్సవాన్ని అధికారికంగా నిర్వహించాలని ఎబివిపి డిమాండ్ చేస్తూ వస్తోంది. మెదక్ జిల్లా సిద్ధిపేటలో పోలీసులు 20 మంది ఎబివిపి కార్యకర్తలను పోలీసులు అరెస్టు చేశారు.