పరిగిలో బహిరంగ సభ: కెసిఆర్ కు చంద్రబాబు సవాల్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు తెలుగుదేశం పార్టీ అధ్యక్షుడు నారా చంద్రబాబు నాయుడు గట్టిగా సమాధానం చెప్పాలని నిర్ణయించుకున్నారు. రంగారెడ్డి జిల్లా పరిగిలో తనపై తెలంగాణవాదులు జరిపిన దాడిని ఆయన సీరియస్ గా తీసుకుంటున్నారు. దీంతో తనపై దాడి జరిగిన పరిగిలోనే భారీగా తెలుగదేశం పార్టీ బహిరంగ సభ నిర్వహించనున్నారు.

పరిగిలో భారీ బహిరంగ సభను నిర్వహించాలని తెలుగుదేశం పార్టీ నాయకులు శనివారం నిర్ణయం తీసుకున్నారు. తెలంగాణలో చంద్రబాబు పర్యటనలను అడ్డుకుంటామనే తెలంగాణవాదుల హెచ్చరికలకు విరుగుడు కనిపెట్టకపోతే సమస్య తలెత్తుతుందనే ఆలోచనలో చంద్రబాబు ఉన్నారు. అందులో భాగంగానే పరిగి సభ నిర్వహించాలని అనుకుంటున్నారు. ఆ సభ తర్వాత తెలంగాణలో ఏ విధమైన కార్యక్రమాలతో ముందుకు వెళ్లాలనే విషయంపై చంద్రబాబు ఆలోచిస్తారని అంటున్నారు.