విద్యార్థిని నడుంపై చేయి వేసిన సిఐ మనోహర్ రెడ్డి బదిలీ

హైదరాబాద్‌: తెలంగాణ విమోచన దినోత్సవం ఆందోళన సందర్భంగా శుక్రవారం ఓ విద్యార్థిని నడుంపై చేయి వేసి అసభ్యంగా ప్రవర్తించిన మనోహర్ రెడ్డిని బదిలీ చేశారు. సంఘటనపై హైదరాబాద్ పోలీసు కమిషనర్ ఎకె ఖాన్ విచారణకు ఆదేశించారు. మనోహర్ రెడ్డి స్థానంలో రవీందర్ కుషాయిగుడా సిఐగా నియమితులయ్యారు. కాగా, హైదరాబాద్ లోని కుషాయిగుడా పోలీసు స్టేషన్ సిఐ మనోహర్ రెడ్డిని సస్పెండ్ చేయాలని, బదిలీ వేటు సిఐకి సరిపోదని అంటూ ఎబివిపి కార్యకర్తలు ఆందోళనకు దిగారు. వారికి మద్దతుగా బిజెపి నాయకులు కూడా వచ్చారు. దీంతో శుక్రవారం అర్థరాత్రి వరకు తీవ్ర ఉద్రిక్తత నెలకొంది.

బిజెపి నాయకులు, ఎబివిపి కార్యకర్తలు శుక్రవారం రాత్రి కుషాయిగుడా పోలీసు స్టేషన్ వద్ద ధర్నాకు దిగారు. పోలీస్‌స్టేషన్‌ వద్ద ధర్నా చేస్తున్న కిషన్‌రెడ్డి, లక్ష్మణ్‌, వెంకటరెడ్డి, మల్లారెడ్డి తదితర నేతలను శుక్రవారం అర్ధరాత్రి దాటాక రెండుగంటల సమయంలో పోలీసులు అరెస్టు చేశారు. బిజెపి కార్యకర్తలు ప్రతిఘటించడంతో ఆ ప్రాంతంలో తీవ్ర ఉద్రిక్తత నెలకొంది.