రాష్ట్రంలోని సగం సంపద వైఎస్ కుటుంబానిదే: జగన్ పై చంద్రబాబు ధ్వజం

హైదరాబాద్: దివంగత ముఖ్యమంత్రి వైఎస్ జగన్మోహనరెడ్డికి 84 కోట్ల రూపాయల పన్ను కట్టే ఆస్తి ఎలా వచ్చిందని తెలుగు దేశం పార్టీ అధినేత, మాజీ ముఖ్యమంత్రి చంద్రబాబునాయుడు మంగళవారం ఎన్టీఆర్ ట్రస్టు భవన్లో విలేకరుల సమావేశంలో ప్రశ్నించారు. 2004కు ముందు లక్షల్లో ఉన్న వారి ఆస్తులు వైఎస్ రాజశేఖర్ రెడ్డి ముఖ్యమంత్రి కాగానే కోట్లకు కోట్లు పెరిగాయని ఆరోపించారు. వైఎస్ ను విమర్శిస్తే జగన్ వర్గం భుజాలు తడుముకుంటుందని, రాజశేఖర్ రెడ్డి ఏమైనా మహాత్మాగాంధీ కంటే గొప్పవాడా అని సూటిగా ప్రశ్నించారు. రాష్ట్రంలోని సంపద అంతా వారి ఇంట్లోనే ఉందన్నారు. గత ఆరు సంవత్సరాలలోని వారి ఆస్తిని సంవత్సరాల వారిగా జగన్ వెల్లడించాలని డిమాండ్ చేశారు.

మైక్రో ఫైనాన్స్ సంస్ధల వేధింపులతో మృతి చెందుతున్న వారి పాపం ప్రభుత్వానిదేనన్నారు. ప్రభుత్వం చేతకానితనం వల్లనే మైక్రో సంస్థల దారుణాలు పెరుగుతున్నాయన్నారు. ఏఐసిసి ప్రధాన కార్యదర్శి రాహుల్ గాంధీయే మైక్రో పైనాన్స్ లను ప్రమోట్ చేశారని గుర్తు చేశారు. రాహుల్ సైతం వారి మృతికి బాధ్యత వహించాన్నారు. మంత్రులు దోచుకోవడానికి పోటీ పడుతున్నారు కానీ రాష్ట్ర ప్రజలను పట్టించుకోవటంలో మాత్రం నిర్లక్ష్యం వహిస్తున్నారన్నారు.

70వేల కోట్లు పెట్టి కామన్వెల్తును నిర్వహిస్తున్న కేంద్రం మన ఆటగాళ్లను పట్టించుకోవటంలో మాత్రం నిర్లక్ష్యం వహిస్తోందన్నారు. కామన్వెల్తుకు కొన్ని నెలలకు ముందుగానే మన ఆటగాళ్లకు తర్ఫిదునిస్తే మరిన్ని స్వర్ణాలు సాధించి ఆస్ట్రేలియా కంటె ముందు ఉండేవాళ్లమని ఆయన అభిప్రాయపడ్డారు. తెలుగు దేశం పార్టీ అధికారంలో ఉన్నప్పుడు ఆటగాళ్లకు ప్రోత్సాహకాలు, రివార్డులు, ఆవార్డులు ఇచ్చి ప్రోత్సహించామని కాని కాంగ్రెస్ ప్రభుత్వం వారిని విస్మరిస్తోందని ఆరోపించారు.