జగన్ ఓదార్పుపై సీబీఐ ఎంక్వయిరీ వేయాలి: వి హనుమంతరావు

హైదరాబాద్: కడప పార్లమెంటు సభ్యుడు వైఎస్ జగన్మోహన్ రెడ్డి ఓదార్పు యాత్రకు జనాలు డబ్బులిస్తేనే వస్తున్నారని రాజ్యసభ సభ్యుడు వి.హనుమంతరావు మరోసారి ఓదార్పుపై మరోసారి విమర్శలు గుప్పించారు. ఓదార్పుపై సీబీఐ విచారణ జరిపించాల్సిన అవసరం ఉందన్నారు. డబ్బులిస్తే నేను కూడా భారీ జనాలతో ఓదార్పును నిర్వహిస్తానని సవాల్ చేశారు.వైఎస్ రాజశేఖర్ రెడ్డి పై ఉన్న సానుభూతితో పాటుగా జగన్ దగ్గర ఉన్న డబ్బులను చూసి జనం వస్తున్నారని ఆయన ధ్వజమెత్తారు.

ఇప్పటి వరకు దివంగత ముఖ్యమంత్రి వైఎస్ రాజశేఖర్ రెడ్డి కెబినెటే ఉందని దానిని మార్చాల్సిన అవసరం ఉందని విహెచ్ ఆభిప్రాయపడ్డారు.ముఖ్యమంత్రి రోశయ్యకు ఇప్పటికైనా సొంత కేబినెట్ ఏర్పాటు చేసుకోవాల్సిన అవసరం ఉందని సూచించారు.పిసిసి అధ్యక్షుడు డి.శ్రీనివాస్, దివంగత ముఖ్యమంత్రి వైఎస్ రాజశేఖర్ రెడ్డి కలిసి గత శాసన సభ ఎన్నికల్లో నాకు టిక్కెట్ రాకుండా చేశారని ఆరోపించారు. ఎమ్మార్ ప్రాపర్టీస్ అక్రమాలపై కూడా సీబీఐ విచారణ జరిపించాలని, ఆ కుంభకోణంలో ఉన్నవారిపై చర్యలు తీసుకోవాలని ప్రభుత్వానికి సూచించారు. నామినేటెడ్ పదవులను పార్టీ అధిష్టానం అడ్డుకోవటం లేదని ఆయన చెప్పారు.