లోకేష్ చానెల్ ఇష్యూ: టార్గెట్ టిడిపి అధినేత చంద్రబాబే

హైదరాబాద్: లోకేష్ సిఇవోగా ఉన్న స్టూడియోఎన్ చానెల్ నుంచి 70 మంది సిబ్బందికి ఉద్వాసన పలికిన సమస్య తెలుగుదేశం పార్టీ అధ్యక్షుడు నారా చంద్రబాబు నాయుడికి చుట్టుకుంటోంది. ఉద్వాసనకు గురైన స్టూడియోఎన్ ఉద్యోగులు సోమవారం జర్నలిస్టు సంఘాల నాయకులతో సమావేశమయ్యారు. జర్నలిస్టు సంఘాల నాయకులు చంద్రబాబును లక్ష్యంగా చేసుకుని విమర్శలు సంధిస్తున్నారు. స్టూడియోఎన్ ఉద్యోగుల ఉద్వాసనపై చంద్రబాబు ప్రతిస్పందన దుర్మార్గమని ఇండియన్ జర్నలిస్టు యూనియన్ (ఐజెయు) సెక్రటరీ జనరల్ కె. శ్రీనివాస్ రెడ్డి అన్నారు. 70 మంది ఉద్యోగుల పొట్ట కొడితే ప్రతిపక్ష నేతగా చంద్రబాబు ప్రతిస్పందించరా అని ఆయన అడిగారు.

స్టూడియోఎన్ వ్యవహారాన్ని వ్యాపారంగా కొట్టేస్తున్న చంద్రబాబు ఎమ్మార్ ప్రాపర్టీస్ వ్యవహారంపై ఎందుకు ఆందోళన చేస్తున్నారని ఆయన అడిగారు. ఎమ్మార్ ప్రాపర్టీస్ ది వ్యాపారం కాదా అని ఆయన అడిగారు. స్టూడియోఎన్ ఉద్యోగుల సమస్య పరిష్కారానికి ఐక్యంగా పోరాడుదామని ప్రెస్ అకాడమీ మాజీ చైర్మన్ దేవులపల్లి అమర్ పిలుపునిచ్చారు. ఉద్వాసనకు గురైన సిబ్బందిలో ఎక్కువ మంది తెలంగాణకు చెందినవారు కావడంతో రాజ్ న్యూస్ కూడా చంద్రబాబును టార్గెట్ చేసుకుని విమర్శలు చేస్తోంది. సాక్షి టీవీ చానెల్ ప్రతి రోజు స్టూడియోఎన్ పై విమర్శలతో వార్తాకథనాలను ప్రసారం చేస్తోంది. స్టూడియోఎన్ ను ఏకంగా బాబు చానెల్ అంటూ వ్యాఖ్యానిస్తోంది.