చంద్రబాబుతో పెరుగుతున్న నాగం జనార్దన్ రెడ్డి విభేదాలు

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడితో ఆ పార్టీ తెలంగాణ సీనియర్ నాయకుడు నాగం జనార్దన్ రెడ్డి విభేదాలు పెరుగుతున్నట్లే కనిపిస్తోంది. చంద్రబాబుతో విభేదాలు ఉన్న మాట నిజమేనని నాగం జనార్దన్ రెడ్డి అంగీకరించారు. ఒకటి రెండు విషయాల్లో చంద్రబాబుతో తనకు విభేదాలున్నాయని, రాజకీయాల్లో అవి సహజమని ఆయన అన్నారు. ఎబిఎన్ ఆంధ్రజ్యోతి టీవీ చానెల్ కు ఇచ్చిన ఇంటర్వ్యూలో ఆయన ఈ విషయాలు చెప్పారు. చలో ఢిల్లీ కార్యక్రమం కోసం ముద్రించిన కరపత్రంపై చంద్రబాబు ఫొటో ఎందుకు ప్రచురించలేదో తెలుసుకుంటానని ఆయన అన్నారు. తెలంగాణ కోసం సోనియా ఇంటి ముందు ఈ నెల 25వ తేదీన తలపెట్టిన ధర్నా కార్యక్రమంపై ఆ కరపత్రాన్ని తెలుగుదేశం తెలంగాణ ఫోరం ప్రచురించింది. కరపత్రంపై చంద్రబాబు ఫొటో ముద్రించకపోవడంపై సొంత పార్టీ నుంచే కాకుండా తెరాస వంటి ఇతర పార్టీల నుంచి కూడా విమర్శలు వస్తున్నాయి. దానిపై తెరాస వ్యాఖ్యానాలు చేస్తోంది.

తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై ఆయన మండిపడ్డారు. తెలంగాణ ఉద్యమంలో తెరాస కార్యకర్తలపై కన్నా తమ పార్టీ కార్యకర్తలపైనే ఎక్కువ కేసులు నమోదయ్యాయని ఆయన అన్నారు. తెలంగాణ జెఎసి కన్వీనర్ కోదండరామ్ కెసిఆర్ కబంధ హస్తాల నుంచి బయటపడాలని ఆయన సూచించారు. తెలంగాణపై ఢిల్లీకి రావాలని తాము ఆహ్వానించినా ఇతర పార్టీలు రాకపోవడం వారిష్టమని ఆయన అన్నారు. తెలంగాణపై శ్రీకృష్ణ కమిటీ నివేదిక వచ్చిన తర్వాత పార్టీలో చర్చించి సమష్టిగా ఉద్యమిస్తామని ఆయన చెప్పారు. ఫజల్ అలీ కమిటీ నివేదిక కన్నా శ్రీకృష్ణ కమిటీ నివేదిక గొప్పదేం కాదని ఆయన అన్నారు.