చంద్రబాబు మెదక్ పర్యటన ఉద్రిక్తం: విద్యార్థుల అరెస్టు

మెదక్: తెలుగు దేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబునాయుడి మెదక్ పర్యటన తీవ్ర ఉద్రిక్తంగా మారింది. మెదక్ జిల్లాలోని గజ్వేల్ లో చంద్రబాబు సూక్ష్మరుణ బాధితులను పరామర్శించేందుకు చంద్రబాబు వెళ్లడానికే ముందే ఉద్రిక్త వాతావరణం చోటు చేసుకుంది. సూక్ష్మరుణ సంస్థల వేధింపులకు ఆత్మహత్యలు చేసుకున్న కుటుంబాలను, ఆత్మహత్య చేసుకున్న రైతు కుటుంబాలను ఆయన పరామర్శించేందుకు వెళ్లారు.

అయితే అక్కడ తెలంగాణవాదులు, విద్యార్థులు, తెలంగాణ రాష్ట్ర సమితి కార్యకర్తలు చంద్రబాబును అడ్డుకోవడానికి ప్రయత్నాలు మొదలు పెట్టారు. తెలుగు దేశం డౌన్ డౌన్, చంద్రబాబు డౌన్ డౌన్ అంటూ నినాదాలు చేశారు. చంద్రబాబు తెలంగాణకు మద్దతిస్తేనే తెలంగాణలో పర్యటించాలని, లేదంటే తెలంగాణలో తిరగనివ్వమని హెచ్చరించారు. తెలంగాణకు మద్దతు ఇవ్వాలనుకుంటే వెంటనే శ్రీకృష్ణ కమిటీకి నివేదిక ఇవ్వాలని వారు సూచించారు.

కాగా విద్యార్థుల అరెస్టును దుబ్బాక ఎమ్మెల్యే సోలిపేట రామలింగారెడ్డి తీవ్రంగా ఖండించారు. ముఖ్యమంత్రి రోశయ్య ప్రతిపక్ష నేత చంద్రబాబుతో కుమ్మక్కయి విద్యార్థులను అరెస్టు చేశారన్నారు. అరెస్టు చేసిన విద్యార్థులను వెంటనే విడుదల చేయాలని లేకుంటే జరగబోయే పరిణామాలకు చంద్రబాబునాయుడే బాధ్యత వహించాలన్నారు. ప్రభుత్వం ప్రజల హక్కును కాలరాస్తుందని, తెలంగాణ ద్రోహి అయిన చంద్రబాబు తన పర్యటన రద్దు చేసుకోవాలని పలువురు తెరాస నేతలు అంటున్నారు.