నా పర్యటనను అడ్డుకోవడం మూర్ఖత్వం: చంద్రబాబు నాయుడు

మెదక్: బాధితులను పరామర్శించడానికి వచ్చిన తనపై తెరాస వాదులు రాళ్లతో దాడి చేయటమేమిటని తెలుగు దేశం పార్టీ అధినేత చంద్రబాబునాయుడు ప్రశ్నించారు. అయన మెదక్ జిల్లోలోని పర్యటనను తెలంగాణవాదులు అడ్డుకున్న విషయం తెలిసిందే. ఆయన గజ్వేల్లోని సభలో ప్రసంగించారు. సూక్ష్మ రుణ సంస్థల వేధింపులతో, ప్రభుత్వం చర్యల కారణంగా ప్రాణాలు కోల్పోయిన వారి కుటుంబాలను పరామర్శించటం తప్పా అన్నారు. తనపై దాడి ప్రజలు చేస్తున్నదని, కేవలం ఓ పార్టీ చేస్తున్నదేనని ఆయన అభిప్రాయపడ్డారు. తన పర్యటనను అడ్డుకోవడం మూర్ఖత్వమని ఆయన అన్నారు.

మిగతా పార్టీలు బాధితులను ఇంత వరకు పరామర్శించింది లేదని, ఆ పార్టీలు చేయని పని నేను చేస్తుంటే అభినందించాల్సింది పోయి ఇలా దాడి చేయటం అమానుషమన్నారు. పార్టీలు ప్రజా సేవలో ఉండాలి. కాని తనపై దాడి చేయటానికో, తన పర్యటనను అడ్డుకోవడానికే కాదని హితవు పలికారు. పర్యటనను అడ్డుకోవటంలో చూపిన శ్రద్ధ ప్రజ సమస్యలు పరిష్కరించటంలో చూపించండన్నారు.

బాధిత కుటుంబాలకు ఎన్టీఆర్ ట్రస్టు భవన్ నుండి 50వేల రూపాయలు ఇవ్వటంతో పాటు వారి పిల్లలకు ఉచితంగా చదువును చెప్పించనున్నట్టు చెప్పారు. సూక్ష్మ రుణ సంస్థలు ప్రజల ముక్కుపిండి డబ్బులు వసూలు చేస్తున్నాయన్నారు. 70 శాతం వరకు వడ్డీని వసూలు చేస్తున్నా ప్రభుత్వం పట్టించుకోకపోవటం శోచనీయమన్నారు. సూక్ష్మ రుణాలు వెంటనే మాఫీ చేయాలని ఆయన ప్రభుత్వాన్ని డిమాండ్ చేశారు.