రైల్వేలైన్ కోసం తెరాస అధ్వర్యంలో ధర్నా: పలుచోట్ల ట్రాఫిక్ జాం

సిద్దిపేట: కొత్తపల్లి - మనోహరాబాద్ ల మధ్య రైల్వేలైన్ ప్రారంభించాలంటూ తెలంగాణ రాష్ట్ర సమితి ఆధ్వర్యంలో మెదక్, కరీంనగర్ జిల్లాల్లో భారీ ఎత్తున ధర్నా చేపట్టారు. ప్రజలు స్వచ్చంధంగా ధర్నాలో పాల్గొని మద్దతు తెలుపుతున్నారు. సిద్దిపేట, సిరిసిల్లల్లో స్థానిక ఎమ్మెల్యేలు హరీష్ రావు, కె.తారకరామారావుల అధ్వర్యంలో ధర్నా చేస్తున్నారు. ప్రభుత్వం వెంటనే రైల్వే లైను ప్రారంభానికి పూనుకోవాలని వారు డిమాండ్ చేస్తున్నారు. పలుచోట్ల రహదారులపై ట్రాఫిక్ జాం అయ్యింది.హరీష్ రావు ఆధ్వర్యంలో సిద్దిపేట దగ్గరలోని రాజీవ్ రహదారిపై ధర్నా నిర్వహించారు. అక్కడ ఇరువైపులా వాహనాలు రెండు కిలోమీటర్ల మేర వాహనాలు నిలిచిపోయాయి. ఎమ్మెల్యేలు రామలింగారెడ్డి, ఈటెల రాజేందర్ లు సైతం ధర్నాలో పాల్గొన్నారు.

దేవుడి వరమిచ్చినా పూజారి కరుణించలేదన్నట్లు రైల్వేలైన్ కోసం కేంద్రం పచ్చజెండా ఊపినా రాష్ట్రం మాత్రం నిర్లక్షం వహిస్తుందని ఆరోపిస్తున్నారు. ముఖ్యమంత్రి కొణిజేటి రోశయ్య దీనిపై శ్రద్ద చూపించకపోతే అందరి ముఖ్యమంత్రుల వలె ఆయన కూడా సీమాంధ్ర పక్షపాతి అనిపించుకోవాల్సి వస్తుందన్నారు. 2006లో తెరాస అధ్యక్షుడు కె.చంద్రశేఖర రావు రైల్వే సహాయ మంత్రిగా ఉన్నప్పుడు రైల్వేలైన్ కోసం కేంద్రం నుండి ఆమోద ముద్ర వేయించుకున్నప్పటికీ ఆ క్రెడిట్ ఎక్కడ కెసిఆర్ కు వెళుతుందోనని నాటి ముఖ్యమంత్రి వైఎస్ దానిని ప్రారంభించలేదని ఆరోపించారు. రోశయ్య ఐనా దానిని ప్రారంభించి తనకు తెలంగాణపై రెండో చూపు లేదని నిరూపించుకోవాలని కోరారు.