నిరసనల మధ్య డిఎస్సీ - 2008 నియామకాల కౌన్సెలింగ్

హైదరాబాద్‌: రాష్ట్రంలోని పలు ప్రాంతాల్లో నిరసనల మధ్య డిఎస్సీ - 2008 నియామకాలకు బుధవారం కౌన్సెలింగ్ ప్రారంభమైంది. పలు జిల్లాల్లో బిఇడి అభ్యర్థులు ఆందోళకు దిగారు. వరంగల్, నిజామాబాద్, కర్నూలుల్లో బిఇడి అభ్యర్థులు కౌన్సెలింగ్ కేంద్రాలను ముట్టడించారు. అనంతపురం, చిత్తూరు జిల్లాల్లో మినహా మిగతా అన్ని జిల్లాల్లో నియామకం ప్రక్రియ ప్రారంభమైంది. మెరిట్ ప్రకారమే పోస్టులను భర్తీ చేయాలని డిమాండ్ చేస్తూ బిఇడి అభ్యర్థులు ఆందోళనకు దిగారు. మొత్తం ఉద్యోగాల్లో బిఇడి అభ్యర్థులకు 70 శాతం, డిఇడి అభ్యర్థులకు 30 శాతం ఉద్యోగాలు ఇవ్వాలని ఆదేశిస్తూ ప్రభుత్వం జీవో జారీ చేసింది.

వరంగల్ లో బిఇడి అభ్యర్థులు కౌన్సెలింగ్ సెంటర్ పై దాడి చేశారు. దీంతో తీవ్ర ఉద్రిక్తత నెలకొంది. వారిని చెదరగొట్టేందుకు పోలీసులు ప్రయత్నించారు. నిజామాబాద్ కౌన్సెలింగ్ సెంటర్ ను బిఇడి అభ్యర్థులు ముట్టడించారు. దీంతో కౌన్సెలింగ్ ప్రక్రియలో గందరగోళం నెలకొంది. కర్నూలులో తీవ్ర ఉద్రిక్తత నెలకొంది. బిఇడి అభ్యర్థులపై పోలీసులు లాఠీచార్జీ చేశారు. డిఇవోను డిఎస్సీ అభ్యర్థులు కొట్టారు. మొత్తం 50 వేల పోస్టుల భర్తీకి పూనుకున్నారు. వీటిలో ఇప్పటికే 20 వేల పోస్టుల భర్తీ జరిగింది. డిఇడి అభ్యర్థులు లేక రెండు వేల పోస్టులు మిగిలిపోయే పరిస్థితి ఏర్పడింది.