వైయస్ జగన్ ను కలిసిన సిఎం కిరణ్ సోదరుడు శ్రీకర్ రెడ్డి

కడప: ముఖ్యమంత్రి ఎన్. కిరణ్ కుమార్ రెడ్డికి వైయస్ జగన్ రాజీనామా సెగ తగిలినట్లే ఉంది. కిరణ్ కుమార్ రెడ్డి సోదరుడు శ్రీకర్ రెడ్డి మంగళవారం ఉదయం వైయస్ జగన్ ను కలిశారు. వైయస్ జగన్ తో కలిసి పనిచేయడానికే శ్రీకర్ రెడ్డి నిర్ణయించుకున్నట్లు సమాచారం. వైయస్ జగన్ పార్టీ పెట్టడం ఖాయమై పోయినట్లే. దీంతో శ్రీకర్ రెడ్డి ఆయన పార్టీలో చేరుతారనే ప్రచారం జరుగుతోంది. కాగా, ప్రజారాజ్యం పార్టీ అధ్యక్షుడు చిరంజీవికి కూడా షాక్ తగిలే పరిస్థితే ఉంది. ప్రజారాజ్యం పార్టీ కర్నూలు జిల్లా కన్వీనర్, శాసనసభ్యురాలు శోభానాగిరెడ్డి భర్త భూమా నాగిరెడ్డి కూడా మంగళవారం వైయస్ జగన్ ను కలిశారు.

వైయస్ జగన్ కోసం పులివెందులకు పెద్ద యెత్తున అభిమానులు చేరుకుంటున్నారు. ఎమ్మెల్సీలు పుల్లా పద్మావతి, జూపూడి ప్రభాకర రావు, పార్లమెంటు సభ్యుడు మేకపాటి రాజమోహన్ రెడ్డి వైయస్ జగన్ ను కలిసినవారిలో ఉన్నారు. వైయస్ జగన్ మంగళవారం తన సన్నిహితులతో విస్తృతంగా మంతనాలు జరుపుతున్నారు.