కెవిపి రామచందర్ రావు పదవి ఊడనట్లే: కిరణ్ ఆదేశాలు ఉత్తవే

హైదరాబాద్: ప్రభుత్వ సలహాదారుగా కెవిపి రామచందర్ రావు పదవి ఇంకా ఊడలేదు. సలహాదారులందరి నుంచి రాజీనామాలు తీసుకోవాలని ఆదేశించినట్లు ముఖ్యమంత్రి కిరణ్ కుమార్ రెడ్డి చెప్పారు. వైయస్ రాజశేఖర రెడ్డి హయాంలోనే కాకుండా రోశయ్య హయాంలోనూ చక్రం తిప్పుతూ వచ్చిన కేవీపీ ఉద్యోగం ఊడినట్లేనని అంతా అనుకున్నారు. వివిధ శాఖల్లో పనిచేస్తున్న 20 మందికిపైగా సలహాదారుల కథ ముగిసిందని భావించారు. సీఎం ఆ ప్రకటన చేశాక కొందరు అడగకముందే, మరికొందరు అడిగిన తర్వాత రాజీనామా పత్రాలను సీఎస్ ‌కు అందజేశారు. సీఎం మాటల ప్రకారం చూస్తే ఇవన్నీ ఇప్పటికే ఆమోదం పొందాల్సి ఉంది. కానీ ఇప్పటి దాకా రాజీనామాలేవీ ఆమోదం పొందలేదు.

సలహాదారుల రాజీనామాల విషయంలో సీఎం ఆదేశాల్లోనే లోపం ఉండడం ప్రధాన కారణమని అంటున్నారు. ఆయన చెప్పినట్లు చేస్తే కేవీపీ సహా పలువురి రాజీనామాలను ఆమోదించడానికి వీల్లేదని అధికారవర్గాలు తెలిపాయి. రాజీనామాలు తీసుకునేందుకు పెద్ద తతంగం నడపాలి. సలహాదారులను తొలగిస్తున్నామని ముఖ్యమంత్రి చెప్పారు కానీ కేవీపీతో పాటు మరో 'సలహాదారు' సోమయాజులు హోదా ఎప్పుడో మారింది. కేవీపీ ప్రజాభద్రతా వ్యవహారాల కమిటీ చైర్మన్ కాగా సోమయాజులు వ్యవసాయ టెక్నాలజీ మిషన్ వైస్ చైర్మన్. 'సలహాదారులను తొలగిస్తున్నాం' అన్న ఆదేశం వీరిద్దరికీ వర్తించదు. వీరిని తొలగించాలంటే వేరే పద్ధతి ఉంటుంది. ఆ పద్ధతిలో సీఎం నుంచి ఇప్పటి దాకా ఆదేశాలు రాలేదు. ఇంకా సీసీ రెడ్డి, స్టాన్లీబాబు, సీఎస్‌రావు సలహాదారులుగా ఉన్నారు. చాలామంది కన్సల్టెంట్లుగా, ఓఎస్డీలుగా ఉన్నారు.

తొలగించాల్సి వస్తే వీరందర్నీ తొలగించాలి. సలహాదారులనే తప్పించాలంటే కేవీపీ, సోమయాజులు వంటి వారిని మినహాయించాలి. కొందరినే తొలగించి, మరికొందరిని కొనసాగిస్తే కొత్త సమస్యలొస్తాయి. దీంతో మొత్తం విషయాన్ని సీఎం పక్కన పెట్టేశారు. అధికారులు రాజీనామాలను కట్టగట్టి పక్కన పడేశారు. సలహాదారులంతా పోయినట్లేనని భావిస్తూ... సోమయాజులు చాంబర్‌ను జీఏడీ అధికారులు మంత్రి కాసు వెంకట కృష్ణారెడ్డికి కేటాయిస్తూ ఉత్తర్వులిచ్చారు. రాజీనామాల విషయంలో సాంకేతిక సమస్యలు ఎదురుకావడంతో నాలుక కరుచుకున్నారు. సోమయాజులు చాంబర్‌ను మంత్రికి కేటాయిస్తూ ఇచ్చిన ఉత్తర్వుల్ని కూడా మార్చేశారు.