వైయస్ రాజశేఖర్ రెడ్డి ఆసలైన రాజకీయ వారసుడు జగన్: మందకృష్ణ

విజయవాడ: దివంగత వైయస్ రాజశేఖర్ రెడ్డి ఆశయాలు ఎవరు నెరవేరుస్తారో వారే ఆయన రాజకీయ వారసులు అవుతారని ఎమ్మార్పీఎస్ అధ్యక్షుడు మందకృష్ణ మాదిగ గురువారం జగన్ లక్ష్యదీక్ష వేదిక వద్ద ప్రసంగిస్తూ అన్నారు. వైయస్ ఆశయాలను నెరవేర్చే జగనే ఆసలు రాజకీయ నాయకుడు అన్నారు. దివంగత ముఖ్యమంత్రి వైయస్ రాజశేఖరరెడ్డి బతికి ఉంటే రైతులకు ఇన్ని కష్టాలు వచ్చేవి కావన్నారు. జగన్ దీక్షను రాజకీయ కోణంలో చూస్తున్నారన్నారు. రైతన్నల సమస్యలు అకస్మాత్తుగా వచ్చింది కాదని పదినెలలుగా వరదలు, అకాల వర్షాలతో వచ్చినవన్నారు. రైతుల సంక్షేమం కోసమే ఏర్పడ్డ ప్రభుత్వం రైతులను ఆదుకోవాలన్నారు.

రైతులు ఆదుకోవాలని ప్రతిపక్షాలు పట్టుబడుతున్న ప్రభుత్వం ఆర్థిక సహాయాన్ని పెంచలేకపోతున్నారన్నారు. రైతాంగ సమస్యలపై జగన్ చిత్తశుద్దితో నిరాహార దీక్ష చేస్తున్నారన్నారు. వైయస్ లో నిజాయితీ, నిబద్దత, ఇచ్చిన మాట నిలబెట్టుకునే దమ్మున్న వ్యక్తి కేవలం వైయస్ రాజశేఖర రెడ్డికి మాత్రమే ఉందన్నారు. వైయస్ ముఖ్యమంత్రిగా ఉన్నప్పుడే గుండెజబ్బులు ఉన్న చిన్నపిల్లలకు వైద్యం చేయించామన్నారు. ప్రజా సంక్షేమం కోసం వేలకోట్లు ప్రకటించారన్నారు. వైయస్ ప్రజా సంక్షేమాన్ని ఆర్థిక కోణంలో కాకుండా మానవీయత కోణంలో చూశారన్నారు. వైయస్ హయాంలో పింఛన్లు పెంచారన్నారు.

జగన్ దీక్షలో నిజాయితీ, నిబద్దత ఉందన్నారు. వైయస్ మరణంతో గుండెపగిలి చనిపోయన వారిని ఓదార్పు పేరుతో ఆదుకున్న నిబద్దత కలిగిన వ్యక్తి జగన్ అన్నాడు. వైయస్ రాజకీయ వారసులం మేమే అనే కాంగ్రెస్ వాళ్లకు ఆయన దగ్గరున్న మానవతా దృక్ఫథం ఏమైందన్నారు. అధికారంలో ఉండి కూడా రైతులను ఎందుకు ఆదుకోలేక పోతున్నారన్నారు. ఎంత డబ్బైనా వెచ్చించి రైతుల కష్టాలు తీర్చేవారన్నారు. ముఖ్యమంత్రి కిరణ్ కుమార్ రెడ్డి చేస్తున్నదంతా వైయస్ వ్యతిరేక పనులేనన్నారు. పేరుకే ఇది ప్రభుత్వముందన్నారు. రైతు ప్రభుత్వమని చెబుతున్న ఈ ప్రభుత్వంలో రైతులు రోడ్డు మీదకు ఎక్కుతున్నారన్నారు. ప్రజల కోసం ఆలోచించినన్ని రోజులు జగన్ కు మద్దతుగా ఉంటానన్నారు.