చంద్రబాబుతో ముఖ్యమంత్రి కిరణ్ కుమ్మక్కు: కొండా సురేఖ

విజయవాడ: రైతుల వేదికను రాజకీయ వేదికగా చేయదలుచుకోలేదని మాజీ మంత్రి, శాసనసభ్యురాలు కొండా సురేఖ గురువారం లక్ష్యదీక్షలో అన్నారు. వైయస్ పై ఉన్న విశ్వసనీయతతోనే ప్రజలు పట్టం గట్టారు. వైయస్ బతికి ఉంటే రైతన్నలు రోడ్డుపైకి వచ్చేవారు కాదన్నారు. 33 మంది పార్లమెంటు సభ్యులను రాష్ట్రంనుండి గెలిపించి పంపిస్తే రాష్ట్రానికి వారు చేసిందేమీ లేదన్నారు. రైతన్నలు చేయి చాచి ఆదుకోమని అడిగినప్పటికీ రాష్ట్ర ప్రభుత్వానికి, కేంద్ర ప్రభుత్వానికి పట్టడం లేదన్నారు.

ప్రభుత్వాన్ని పడగొట్టే ఆలోచన జగన్ కు లేదని చెప్పారు. జగన్ విషయాన్ని డైవర్ట్ చేయడానికి చాలామంది కుట్రలు పన్నుతున్నారన్నారు. ముఖ్యమంత్రి కిరణ్ కుమార్ రెడ్డి జగన్ దీక్షకు మద్దతు ప్రకటించాల్సింది పోయి తెలుగుదేశం పార్టీతో కుమ్మక్కయ్యారన్నారు. జగన్ దీక్షకు కూర్చున్నప్పుడే తెలుగుదేశం పార్టీ 48 గంటల బంద్ కు పిలుపునిచ్చిందన్నారు. జగన్ దీక్షను దెబ్బతీయడానికి ఈ రోజు రోడ్ల నిర్భంధాన్ని తెలుగుదేశం ప్రభుత్వం చేపడుతుందన్నారు.

తెలుగుదేశం ప్రభుత్వం హయాంలో రైతులకు ఏమీ చేయలేదన్నారు. డబ్బుకోసం రైతులు ఆత్మహత్య చేసుకున్నారని, వ్యవసాయం దండగ అన్న వారు ఇప్పుడు దీక్ష చేయడం సిగ్గు చేటు అన్నారు. చంకలో బిడ్డను పెట్టుకొని ఊరంతా వెతికిన చందంగా చంద్రబాబు తీరు ఉందన్నారు. జగన్ దీక్షకు నిబద్దత ఉందన్నారు. రైతుల సమస్యలు తీర్చాలంటే వ్యవసాయం తెలవాల్సిన అవసరం లేదన్నారు. ఓ రాజకీయ నాయకుడు సభ ఏర్పాటు చేస్తే అందరూ రైతులు, చేనేత కార్మికులే రారని చెప్పారు.