చంద్రబాబుకు మరో తెలంగాణ షాక్: తెరాసలోకి ముగ్గురు ఎమ్మెల్యేలు

హైదరాబాద్: తెలంగాణపై రెండు కళ్ల సిద్ధాంతం తెలుగుదేశం పార్టీ అధ్యక్షుడు నారా చంద్రబాబునాయుడికి మరో షాక్ ఇచ్చింది. మహబూబ్ నగర్ జిల్లాకు చెందిన మాజీ పార్లమెంటు సభ్యుడు జితేందర్ రెడ్డి తెలుగుదేశం పార్టీకి రాజీనామా చేసి ఇప్పటికే తెలంగాణ రాష్ట్ర సమితి (తెరాస)లో చేరిన కొద్దిరోజులకే మరో ముగ్గురు తెలుగుదేశం శాసనసభ్యులు కూడా అదే బాటలో పయనించడానికి నిర్ణయం తీసుకున్నట్లు తెలుస్తోంది. నిజామాబాద్ జిల్లా బాన్సువాడ శాసనసభ్యుడు పోచారం శ్రీనివాస రెడ్డి తెలుగుదేశం పార్టీకి గుడ్ బై చెప్పి తెరాసలో చేరే అవకాశాలున్నాయి. ఈ మేరకు ఆయన తన నియోజకవర్గంలోని కార్యకర్తలతో సమావేశమయ్యారు. తెలంగాణపై పార్టీ వైఖరితో తీవ్ర ఇబ్బందులకు గురవుతున్న నేపథ్యంలో ఆయన ఈ నిర్ణయం తీసుకున్నట్లు తెలుస్తోంది.

మరో ఇద్దరు శాసనసభ్యులు సుద్దాల దేవయ్య, వేణుగోపాలాచారి కూడా తెలుగుదేశం పార్టీకి రాజీనామా చేసి తెరాసలో చేరనున్నట్లు వార్తలు వస్తున్నాయి. పోచారం శ్రీనివాస రెడ్డిని బుజ్జగించడానికి తెలుగుదేశం పార్టీ నాయకులు రంగంలోకి దిగారు. పార్టీ సీనియర్ నేత టి. దేవేందర్ గౌడ్ ఆదివారం నిజామాబాద్ జిల్లాలో పర్యటించారు. పోచారం శ్రీనివాస రెడ్డికి నచ్చజెప్పడానికే ఆయన జిల్లాలో పర్యటించినట్లు చెబుతున్నారు. అయితే, దేవేందర్ బుజ్జగింపులు పనిచేయలేదని తెలుస్తోంది. దీంతో సోమవారం మరో సీనియర్ నేత నాగం జనార్దన్ రెడ్డి రంగంలోకి దిగారు. పోచారం శ్రీనివాస రెడ్డిని నివారించేందుకు ఆయన ప్రయత్నిస్తున్నట్లు తెలుస్తోంది. అయినా పోచారం శ్రీనివాస రెడ్డి వినడం లేదని తెలుస్తోంది.

ఈ ముగ్గురు శాసనసభ్యులే కాకుండా మరో పది మంది దాకా ఇదే బాట పట్టనున్నట్లు ప్రచారం జరుగుతోంది. తెలంగాణపై చంద్రబాబు వైఖరికి నిరసనగా, కాంగ్రెసు నాయకత్వంలోని కేంద్ర ప్రభుత్వ వైఖరికి నిరసనగా వారు శాసనసభా సభ్యత్వాలకు కూడా రాజీనామాలు చేసే అవకాశాలున్నట్లు తెలుస్తోంది. తమ తమ నియోజకవర్గాల్లో పార్టీ క్యాడర్ మొత్తం తెరాసలోకి మళ్లిన నేపథ్యంలో, గత ఉప ఎన్నికల్లో తమ పార్టీకి వందల ఓట్లు కూడా పోల్ కాని స్థితిలో వారు పార్టీ నుంచి తప్పుకోవడమే మంచిదనే అభిప్రాయానికి వచ్చినట్లు తెలుస్తోంది.