పార్టీ మార్పుపై మనసు మార్చుకున్న ఎమ్మెల్యేలు సుద్దాల, షిండే

కరీంనగర్\నిజామాబాద్: తెలంగాణ రాష్ట్ర సాధన కోసం తెలంగాణ రాష్ట్ర సమితిలో చేరుతారనే పుకార్లు వచ్చిన నిజామాబాద్ జిల్లా జూక్కల్ శాసనసభ్యుడు హనుమంతు షిండే, కరీంనగర్ జిల్లా చొప్పదండి శాసనసభ్యుడు సుద్దాల దేవయ్య తమ మనసును మార్చుకున్నట్లుగా తెలుస్తోంది. కార్యకర్తలతో సమావేశమైన అనంతరం సుద్దాల దేవయ్య, చంద్రబాబును కలిసిన అనంతరం హనుమంతు షిండే తెలుగుదేశం పార్టీలోనే ఉంటున్నట్లు ప్రకటించారు. తెలంగాణ టిడిపి పెట్టాలని కార్యకర్తలు కోరుతున్నారని, ఈ విషయాన్ని తాను చంద్రబాబు దృష్టికి తీసుకుని వెళ్తానని సుద్దాల దేవయ్య చెప్పారు.

తెలుగుదేశం పార్టీలో ఉండి తెలంగాణ సాధన కోసం పోరాడాలని కార్యకర్తలు సమావేశంలో సూచించినట్టు సుద్దాల దేవయ్య చెప్పారు. మెజారిటీ కార్యకర్తలు తెలుగుదేశం పార్టీ వైపు మొగ్గారని చెప్పారు. కార్యకర్తల మనోభావాల మేరకే తాను టిడిపిలో కొనసాగాలని నిర్ణయించుకున్నట్లు చెప్పారు. కార్యకర్తల మనోభావాలను చంద్రబాబు దృష్టికి తీసుకు వెళతానన్నారు. పోచారం శ్రీనివాస్‌రెడ్డి పార్టీకి రాజీనామా చేశారని మరో శాసనసభ్యుడు హనుమంతు షిండే అన్నారు. తెలంగాణ కోసం మా పోరాటం సాగుతుందన్నారు. తెలుగుదేశం పార్టీకి తెలంగాణలో ఢోకా లేదన్నారు. తాను పార్టీ మారుతుందనే వార్తలో నిజం లేదన్నారు. తనకు అసలు అలాంటి ఉద్దేశ్యమే లేదని చెప్పారు.