న్యాయం అడిగితే తెలంగాణకు అన్యాయం చేసిన శ్రీకృష్ణ కమిటీ: గద్దర్

హైదరాబాద్: శ్రీకృష్ణ కమిటీ నివేదిక కోస్తాంధ్ర, తెలంగాణ, సీమల మధ్య మరింత చిచ్చు పెట్టే విధంగా ఉందని ప్రజా గాయకుడు, తెలంగాణ ప్రజా ఫంట్ చైర్మన్ గద్దర్ గురువారం అన్నారు. తెలంగాణ ప్రత్యేక రాష్ట్రం కోసం అందరూ ఉద్యమించాలని పిలుపునిచ్చారు. అయితే శాంతియుతంగా మన ఉద్యమాలు కొనసాగించాలన్నారు. సహాయ నిరాకరణతో పాలనను స్తంభింప చేయాలన్నారు. అఖిలపక్షం పేరుతో ఢిల్లీకి రమ్మన్న కేంద్ర హోంమంత్రి చిదంబరం నివేదికతో తేల్చింది ఏమీ లేదన్నారు.

కాంగ్రెసు పాలనలో తెలంగాణకు కన్నీళ్లే మిగిలాయన్నారు. తెలంగాణ, రాయలసీమ, కోస్తాంధ్ర అంతా తిరిగిన జస్టిస్ శ్రీకృష్ణ కమిటీ న్యాయం చేస్తాడనుకుంటే అన్యాయం చేశాడన్నారు. చిదంబరం పిలుపు తెలంగాణపై చితి పేర్చిందన్నారు. తెలంగాణ కోసం ఎందరో అమరవీరులు త్యాగాలు చేశారన్నారు. పాలకుల కారణంగా తెలంగాణలో కన్నీళ్లు రాలని రోజు లేదన్నారు. మా భూమి మాకు, మా నీళ్లు మాకు ఇవ్వమని అడిగితే మనవి మనకే ఇవ్వడం లేదన్నారు.