శ్రీకృష్ణ కమిటీ నివేదికపై తెలంగాణ ఎంపీలకు ప్రణబ్ హుకుం

న్యూఢిల్లీ: శ్రీకృష్ణ కమిటీ నివేదికపై నోరు విప్పొద్దని కేంద్ర ఆర్థిక మంత్రి ప్రణబ్ ముఖర్జీ కాంగ్రెసు తెలంగాణ ప్రాంత పార్లమెంటు సభ్యులను ఆదేశించారు. బుధవారం రాత్రి తెలంగాణ పార్లమెంటు సభ్యులకు ఆయన క్లాస్ తీసుకున్నారు. శ్రీకృష్ణ కమిటీ నివేదికలాంటి భారీ నివేదికను అధ్యయనం చేసి ఒక అభిప్రాయానికి రావడానికి కనీసం మూడు నెలల సమయమైనా కావాల్సి ఉంటుందని, అప్పటి వరకూ మీరు ఎలాంటి తొందరపాటు నిర్ణయాలకు పోవద్దని కాంగ్రెస్‌ అగ్రనేతలు తెలంగాణ ఎంపీలకు హితబోధ చేశారు. గురువారం శ్రీకృష్ణ కమిటీ నివేదిక ప్రజల ముందుకు రానున్న తరుణంలో కాంగ్రెస్‌ అగ్రనేతలు ప్రణబ్‌ముఖర్జీ, అహ్మద్‌పటేల్‌, ఎ.కె.ఆంటోనీ, వీరప్ప మొయిలీలు బుధవారం రాత్రి తెలంగాణ ఎంపీలతో సుమారు గంటసేపు భేటీ అయ్యారు. వీరంతా వెళ్లిపోయిన తర్వాత ముఖ్యమంత్రి కిరణ్‌కుమార్‌రెడ్డి వచ్చి సుమారు 20 నిమిషాలు పార్టీ అగ్రనేతలతో మాట్లాడారు. ముఖ్యమంత్రి వెళ్లిపోయిన తర్వాత పీసీసీ అధ్యక్షుడు డి.శ్రీనివాస్‌ వచ్చినా అప్పటికే పార్టీ నాయకులంతా వెళ్లిపోవడంతో ఆయన వెంటనే వెనుదిరిగారు.

కేంద్రమంత్రి జైపాల్ ‌రెడ్డి, ఎంపీ జి.సంజీవరెడ్డి తప్ప మిగతా తెలంగాణ ప్రాంత లోక్‌ సభ, రాజ్యసభ సభ్యులంతా పాల్గొన్న ఎంపీల సమావేశం వాడీవేడిగా జరిగింది. ప్రణబ్‌ముఖర్జీ నేతృత్వంలో జరిగిన ఈ సమావేశంలో పార్టీ అగ్రనేతలు ప్రతి ఎంపీ చేత మాట్లాడించి అభిప్రాయాలు తెలుసుకున్నారు. నివేదికను పూర్తిగా చదవకుండా ఏ అభిప్రాయానికీ రావద్దని కోరారు. ఎంపీలంతా ఎవరికి వారు తమ ఆవేదనను ఏకరువు పెట్టారు. పార్టీ ఇచ్చిన హామీని అమలు చేయాలని కోరుతున్నాం తప్పితే తామేమీ కొత్త కోరిక కోరడంలేదని పేర్కొన్నట్లు తెలిసింది. భావోద్వేగాలు అధికంగా ఉన్న ప్రస్తుత పరిస్థితుల్లో నియోజకవర్గాల నుంచి పూర్తి స్థాయిలో ఒత్తిడి ఎదుర్కోవాల్సి వస్తోందని ఎంపీలంతా ముక్తకంఠంతో అన్నట్లు సమాచారం. తెలుగుదేశం, తెరాస, భాజపా నాయకులు ఇచ్చే ప్రకటనలతో మేం ఇబ్బందులు ఎదుర్కోవాల్సి వస్తోంది. విధిలేని పరిస్థితుల్లో తామూ మాట్లాడాల్సి వస్తోందని పేర్కొన్నట్లు సమాచారం. ముస్లింలు తెలంగాణకు వ్యతిరేకమన్న భావన అసత్యమని, ఎంఐఎం కూడా ప్రస్తుతం ప్రత్యేక రాష్ట్రానికి మద్దతు పలుకుతోందని ఓ ఎంపీ పేర్కొన్నట్లు తెలిసింది. అందరి ఆవేదనను తాము సానుకూలంగా అర్థం చేసుకున్నామని, సమయానుకూలంగా నిర్ణయాలు తీసుకోవాల్సి ఉంటుంది కాబట్టి అందరూ ఓపిక పట్టాలని పార్టీ పెద్దలు సూచించినట్లు తెలుస్తోంది.