కాంగ్రెస్ ఉచ్చులో రాష్ట్ర పార్టీలు, త్వరలో జై ఆంధ్ర: కిషన్‌రెడ్డి

హైదరాబాద్: శ్రీకృష్ణ కమిటీ పేరుతో కాంగ్రెస్ ప్రభుత్వం వేసిన ఉచ్చులో రాష్ట్రంలోని కొన్ని పార్టీలు చిక్కుకున్నాయని భారతీయ జనతా పార్టీ అధ్యక్షుడు, అంబర్‌పేట శాసనసభ్యుడు గంగారపు కిషన్‌రెడ్డి గురువారం వ్యాఖ్యానించారు. శ్రీకృష్ణ కమిటీ పేరుతో కాంగ్రెస్ ప్రభుత్వం సమయాన్ని వృథా చేస్తుందన్నారు. తెలంగాణ ప్రజల ఓర్పును పరిక్షిస్తుందని అన్నారు. తెలంగాణ కోసం అందరూ ఏకత్రాటిపైకి వచ్చి ఉద్యమించాలని పిలుపునిచ్చారు. రాజకీయ పార్టీలు, సంఘాలు అందరూ ప్రజల ఆకాంక్ష మేరకు వారితో మమేకమై పోరాడాలన్నారు.

విద్యార్థులు తెలంగాణ కోసం పోరాడాల్సింది తోటి ప్రజలు, వ్యాపార సంస్థలపై కాదని కిషన్‌రెడ్డి అన్నారు. తెలంగాణపై మాట మార్చిన పార్టీలపై ఇప్పుడు పోరాడాలన్నారు. తెలంగాణ కోసం విద్యార్థుల బలిదానాలకు కారణం కాంగ్రెస్ పార్టీ జాతీయ అధ్యక్షురాలు సోనియాగాంధీయే అని ఆరోపించారు. త్వరలో భారతీయ జనతా పార్టీ ఆధ్వర్యంలో జై ఆంధ్ర ఉద్యమానికి శ్రీకారం చుడతామన్నారు.