తెలంగాణ ప్రకటించకుంటే నక్సలిజం పెరుగుతుంది: రేవంత్‌ రెడ్డి

నల్గొండ: తెలంగాణ అంశాన్ని పక్కదోవ పట్టించడానికే రాష్ట్ర ప్రభుత్వం రచ్చబండ కార్యక్రమాన్ని ప్రారంభించిందని తెలుగుదేశం పార్టీ సీనియర్ నాయకుడు, కొండగల్ శాసనసభ్యుడు రేవంత్‌రెడ్డి మంగళవారం ప్రభుత్వంపై ఆరోపణలు చేశారు. ప్రజలందరూ తెలంగాణ ఉద్యమంలో తలమునకలై ఉన్న సమయంలో అభివృద్ధి పేరుతో వారి దృష్టి మరల్చేందుకు ముఖ్యమంత్రి కిరణ్‌కుమార్ రెడ్డి రచ్చబండ కార్యక్రమాన్ని ప్రారంభించారని అన్నారు. ఇలాంటి చర్యలు ప్రభుత్వానికి సరికావని అన్నారు. తెలంగాణ ప్రకటించకుంటే నక్సలైట్ సమస్య ఎక్కువయ్యే ప్రమాదముందని హెచ్చరించారు.

తెలంగాణ అంశాన్ని పక్కదోవ పట్టించడానికే అన్న విషయం తెలంగాణ ప్రజలకు తెలిసినందువల్లే తెలంగాణలో రచ్చబండను ఎవరూ ఆమోదించడం లేదన్నారు. ప్రభుత్వం చర్యలు ఇలా ఉంటే ప్రజలు ఆమోదించరని అన్నారు. వారిని గ్రామాలలోకి కూడా రానివ్వరని సూచించారు. తెలుగుదేశం పార్టీ తెలంగాణ ఫోరం ప్రత్యేక తెలంగాణ రాష్ట్రానికి కట్టుబడి ఉందని స్పష్టం చేశారు. ప్రజల మనోభావాల ప్రకారమే తెలంగాణ ఫోరం నడుచుకుంటుందని చెప్పారు.