దేశ చరిత్రలో లేని అవినీతి కాంగ్రెసు‌ది: నిప్పులు చెరిగిన కిషన్‌ రెడ్డి

హైదరాబాద్: దేశ చరిత్రలో ఎన్నడూ లేని విధంగా కాంగ్రెసు పార్టీ ఆధ్వర్యంలోని కేంద్ర, రాష్ట్ర ప్రభుత్వాలు అవినీతికి పాల్పడ్డాయని భారతీయ జనతా పార్టీ రాష్ట్ర అధ్యక్షుడు, అంబర్‌పేట శాసనసభ్యుడు గంగారపు కిషన్‌రెడ్డి సోమవారం ఆరోపించారు. కాంగ్రెసు పూర్తిగా అవినీతిలో కూరుకు పోయిందన్నారు. ఫిబ్రవరి 17న ఎన్డీయే ఆధ్వర్యంలో ఏర్పాటు చేయనున్న బహిరంగ సభ పోస్టరును విడుదల చేశారు. ఈ సందర్భంగా ఆయన మాట్లాడారు. అత్యంత అవినీతికి పాల్పడి బయటపడిన కాంగ్రెసు‌కు అధికారంలో కొనసాగే హక్కు లేదన్నారు.

2జి స్పెక్ట్రం, కామన్వెల్తు, ఆదర్శ్ కుంభకోణం వంటి లక్షల కోట్ల కుంభకోణాలు బయటపడిన 2010ని బ్లాక్ సంవత్సరంగా ప్రకటించాలని కిషన్‌ రెడ్డి అన్నారు. రాష్ట్ర, కేంద్ర ప్రభుత్వాల అవినీతిపై ప్రజలను చైతన్యం చేస్తామన్నారు. కాంగ్రెసు అవినీతిపై ఫిబ్రవరి 17వ తేదిన హైదరాబాదులో భారీ బహిరంగ సభ జరుగుతుందన్నారు. విద్యార్థులకు ఫీజులు చెల్లించక పోవటంతో వారు తీవ్ర ఇబ్బందులకు గురవుతున్నారన్నారు. వారికి వెంటనే ప్రభుత్వం ఫీజులు చెల్లించాలని డిమాండ్ చేశారు.