దిగిపోతా కానీ అల్లర్లు మరింత పెరుగుతాయమో: హోస్నీ ముబారక్

కైరో: ఈజిప్టు అధ్యక్షుడు హోస్నీ ముబారక్‌ కొత్త రాగం అందుకున్నారు. తాను రాజీనామా చేయడానికి సిద్ధమే కానీ తదనంతరం దేశంలో మరింతగా అల్లర్లు చెలరేగుతాయోమోనని ఆయన ఆందోళన వ్యక్తం చేశారు. ప్రభుత్వ వ్యతిరేక ఆందోళనలు చేలరేగిన తర్వాత తొలిసారి ఓ మీడియా సంస్థకు ఇంటర్వ్యూ ఇచ్చిన ఆయన దేశంలో నెలకొన్న హింసాయుత వాతావరణానికి విపక్షాలను తప్పు బట్టారు. అధ్యక్షుడిగా తాను అలసిపోయానని, పదవిని ఈ క్షణమే వదలడానికి సిద్ధంగా ఉన్నానని, అయితే దేశం మరింత సంక్షోభంలో కూరుకుపోతుందేమోనని భయంగా ఉందని ఆయన అన్నారు.

తహ్రీర్ స్క్వైర్ వద్ద జరిగిన హింసాత్మక సంఘటనలతో తనకు ఇబ్బంది కలుగుతోందని, అయితే దానికి తాను బాధ్యుడిని కాదని ఆయన అన్నారు. ఈజిప్టువారు పరస్పరం కలహించుకోవడం తనకు ఇష్టం లేదని ఆయన అన్నారు. తన గురించి ప్రజలు ఏమనుకుంటున్నారనేది తాను పట్టించుకోదలుచుకోలేదని, ప్రస్తుతం తాను దేశాన్ని పట్టించుకుంటానని, ఈజిప్టు గురించి ఆలోచిస్తానని ఆయన అన్నారు. తన కుమారుడు గమాల్ తన వారసుడిగా రావాలని తాను ఏ రోజూ కోరుకోలేదని ఆయన అన్నారు. తాను పారిపోదలుచుకోలేదని, ఈ మట్టి మీదే మరణిస్తానని ఆయన అన్నారు.

మరోవైపు ప్రభుత్వ వ్యతిరేక ఉద్యమాన్ని పత్రికలకెక్కకుండా నిరోధించేందుకు విదేశీ, ఈజిప్టు పాత్రికేయులపై జరుగుతున్న దాడులను అమెరికా విదేశాంగ కార్యదర్శి హిల్లరీ క్లింటన్‌ ఖండించారు. పత్రికా స్వేచ్ఛను, అంతర్జాతీయ నియమాలను ఈ దాడులు ఉల్లంఘిస్తున్నాయని ఆమె అన్నారు. ఏ పరిస్థితుల్లోనూ ఈ దాడులు సమర్థనీయం కాదని చెప్పారు. ప్రభుత్వం, ప్రతిపక్షాలు, రాజకీయ పార్టీలు చర్చల ద్వారా శాంతియుత మార్పును తీసుకురావాలని ఆమె కోరారు.