అసెంబ్లీని ఇలాగే అడ్డుకుంటాం: తెలంగాణపై నాగం జనార్దన్ రెడ్డి

By Pratap

Published: Thursday, February 17, 2011, 12:49 [IST]

హైదరాబాద్: పార్లమెంటులో తెలంగాణ రాష్ట్ర ఏర్పాటుకు బిల్లు ప్రతిపాదించే వరకు ఇలాగే అడ్డుకుంటామని తెలుగుదేశం తెలంగాణ ఫోరం కన్వీనర్ నాగం జనార్దన్ రెడ్డి చెప్పారు. ఉభయ సభలను ఉద్దేశించి గవర్నర్ ప్రసంగించిన తర్వాత ఆయన గురువారం మీడియా ప్రతినిధులతో మాట్లాడారు. గవర్నర్ తన ప్రసంగాన్ని అర్థాంతరంగా ముగించుకుని వెళ్లిపోవడం తెలంగాణ ప్రజల అభీష్టానికి అద్దం పడుతుందని ఆయన అన్నారు. తెలంగాణ ప్రజల మనోభావాలను ఉభయ సభల సమావేశం ప్రతిబంబించిందని ఆయన అన్నారు.

తెలంగాణ కోసం ఇంతకు ముందు ఇచ్చిన హామీలేవీ అమలు కాలేదని, ఇచ్చిన హామీలను కూడా తుంగలో తొక్కి కాంగ్రెసు తెలంగాణ ప్రజలను మోసం చేస్తోందని ఆయన విమర్శించారు. తెలంగాణ ప్రజల నోట్లో మట్టి కొడుతున్నారని ఆయన అన్నారు. తెలంగాణ విద్యార్థులు ఆత్మహత్యలు చేసుకున్నా కేంద్రానికి కనికరం రావడం లేదని ఆయన అన్నారు. తెలంగాణ కోసం అసెంబ్లీలో తీర్మానం ప్రతిపాదించే వరకు, పార్లమెంటులో బిల్లు ప్రతిపాదించే వరకు అసెంబ్లీ సమావేశాలను అడ్డుకుంటామని ఆయన చెప్పారు. తమ శక్తి ఏమిటో చూపిస్తామని ఆయన అన్నారు. కాంగ్రెసు పార్టీ మోసాలు ఇక ఏ మాత్రం సాగవని ఆయన అన్నారు. తెలుగుదేశం తెలంగాణ ప్రాంత శాసనసభ్యులు ఎర్రబెల్లి దయాకర రావు, మోత్కుపల్లి నర్సింహులు కూడా మాట్లాడారు.

Published On February 17, 2011