పాక్ గాయకుడు రాహత్ ఫతే అలీఖాన్‌కు 15 లక్షల జరిమానా

By Srinivas

Published: Sunday, February 20, 2011, 13:53 [IST]

న్యూఢిల్లీ: నిబంధనలకు విరుద్దంగా విదేశీ కరెన్సీతో గతవారం ఇందిరాగాంధీ ఇంటర్నేషనల్ ఎయిర్ పోర్టులో దొరికిన ప్రముఖ పాక్ గాయకుడు రాహత్‌ ఫతే అలీ ఖాన్, అతడి మేనేజర్‌ మరూఫ్‌కు రూ. 15 లక్షల జరిమానా విధించారు. కస్టం నిబంధనలననుసరించి ఆయనకు శిక్ష విధించారు. నిబంధనలకు విరుద్ధంగా సుమారు 60 లక్షల రూపాయల విదేశీ నగదును తీసుకెళుతున్న రాహత్‌ సహా అతడి బృందాన్ని ఫిబ్రవరి 13న ఇందిరాగాంధీ అంతర్జాతీయ విమానాశ్రయంలో రెవెన్యూ నిఘా డీఆర్‌ఐ అధికారులు నిర్బంధించారు. ఆయనతో పాటు 16 సభ్యుల బృందాన్ని అధికారులు అదుపులోకి తీసుకున్నారు.

రాహత్‌ను విడిచిపెట్టాలంటూ పాక్ భారత్‌ను కోరడంతో రాహత్‌ను అధికారులు విడుదల చేశారు. అతడి పాస్‌పోర్ట్‌ను స్వాధీనం చేసుకొని దేశం విడిచి వెళ్లకూడదని ఆదేశించారు. అధికార యంత్రాంగానికి జరిమానా మొత్తాన్ని అందించిన తర్వాతే రాహత్‌, మరూఫ్‌లు దేశం విడిచి వెళతారు.

Published On February 20, 2011