తెరాస ఎమ్మెల్యేలతో పయ్యావుల భేటీ, బడ్జెట్ ప్రసంగం బహిష్కరణ

By Pratap

Published: Wednesday, February 23, 2011, 11:45 [IST]

హైదరాబాద్‌: శానససభలో ఆర్థిక మంత్రి ఆనం నారాయణ రెడ్డి బడ్జెట్ ప్రసంగాన్ని బహిష్కరించాలని తెలుగుదేశం పార్టీ తెలంగాణ శాసనసభ్యులు నిర్ణయించుకున్నారు. దీంతో వారు ఆసెంబ్లీ ఆవరణలోని గాంధీ విగ్రహం వద్ద ధర్నాకు దిగారు. శాసనసభలో తెలంగాణ తీర్మానం ప్రతిపాదించాలని డిమాండ్ చేస్తూ తెలుగుదేశం శాసనసభ్యులు ఈ ఆందోళనకు దిగారు. శాసనసభ సమావేశాల్లో తెలంగాణ రాష్ట్ర సమితి (తెరాస)ను కలుపుకుని పోవడానికి తెలుగుదేశం పార్టీ ప్రయత్నాలు సాగిస్తోంది. ఇందులో భాగంగా తెలుగుదేశం సీమాంధ్ర శానససభ్యుడు పయ్యావుల కేశవ్ తెరాస శానససభ్యులతో సమావేశమయ్యారు.

శాసనసభలో తెలంగాణ తీర్మానాన్ని ప్రతిపాదించాలని తెలుగుదేశం సీమాంధ్ర శానససభ్యులు ప్రయత్నాలు సాగిస్తున్నారు. దీనిపై తెరాస సహకారం కోరడానికి ఆయన ఆ పార్టీ శాసనసభ్యులతో సమావేశమైనట్లు సమాచారం. శాసనసభ సమావేశాలు ప్రారంభమైనప్పటి నుంచి తెలంగాణ సమస్యపై శాసనసభ సమావేశాలు అట్టుడుకుతూనే ఉన్నాయి. సభా కార్యక్రమాలు ముందుకు సాగడం లేదు. బుధవారం కూడా తెలంగాణపై తెరాస సభ్యులు, తెలుగుదేశం తెలంగాణ ప్రాంత శాసనసభ్యులు ఆందోళనకు దిగడంతో శాసనసభ మూడు సార్లు వాయిదా పడింది. ఈ స్థితిలో డిప్యూటీ స్పీకర్ నాదెండ్ల మనోహర్‌తో మంత్రులు ఆనం రామనారాయణ రెడ్డి, ధర్మాన ప్రసాదరావు, శైలజానాథ్, ప్రభుత్వ చీఫ్ విప్ మల్లు భట్టివిక్రమార్క సమావేశమయ్యారు.

Published On February 23, 2011