జగన్‌కు హైకోర్టు నోటీసులు: కేంద్రం, రాష్ట్ర ప్రభుత్వాలకు సైతం

హైదరాబాద్: రాష్ట్ర అత్యున్నత న్యాయస్థానం హైకోర్టు మంగళవారం మాజీ పార్లమెంటు సభ్యుడు వైఎస్ జగన్మోహన్ రెడ్డికి నోటీసులు జారీ చేసింది. జగన్‌కు చెందిన జగతి, సండూరు ప్రాజెక్టు మరికొన్ని కంపెనీలలో అక్రమాలపై విచారణను చేపట్టేందుకు హైకోర్టు ఆయా కంపెనీలకు నోటీసులు జారీ చేసింది. జగన్ అక్రమ ఆస్తులపై తెలుగుదేశం పార్టీ వేసిన పిల్‌ను పరిగణలోకి తీసుకున్న హైకోర్టు నోటీసులు జారీ చేసింది. జగన్‌తో పాటుగా రాష్ట్ర ప్రభుత్వానికి, కేంద్ర ప్రభుత్వానికి సైతం నోటీసులు జారీ చేసింది.

టిడిపి వేసిన పిల్‌ను విచారణకు స్వీకరించిన కోర్టు ముగ్గురికి నోటీసులు జారీ చేసింది. దీనిపై విచారణ మార్చి 25వ తేదిన ఉంటుందని చెప్పారు. మంత్రి శంకర్‌రావు పిటిషన్‌తో పాటు టిడిపి పిల్‌పై కూడా అదే రోజు విచారించనుంది. కాగా ఆదాయ పన్ను శాఖ సైతం జగన్‌కు చెందిన జగతి పబ్లికేషన్‌కు రెండు నోటీసులు గతంలోనే జారీ చేసిన విషయం బహిర్గతం అయిన విషయం తెలిసిందే. ఇందులో సుమారు 122 కోట్ల రూపాయల అవకతవకలు జరిగినట్టు తెలుస్తోంది.