మోసం చేయాలనుకున్నారు, చేశారు: వైయస్ జగన్‌పై డిఎస్

By Srinivas

Published: Friday, March 18, 2011, 17:33 [IST]

హైదరాబాద్: మాజీ పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులపై ప్రదేశ్ కాంగ్రెస్ కమిటీ అధ్యక్షుడు డి శ్రీనివాస్ శుక్రవారం ధ్వజమెత్తారు. కొందరు ఎమ్మెల్యేలు మోసం చేయాలనుకున్నారు చేశారని విమర్శించారు. పార్టీ విప్ ధిక్కరించి ఓటు వేసిన వారిపై పార్టీ, ప్రభుత్వం సీరియస్‌గా ఉందన్నారు. పార్టీకి వ్యతిరేకంగా ఓటు వేసిన వారు సాధించిందేమిటన్నారు. వ్యతిరేక ఓటు వేసిన వారు ఒకసారి ఆత్మపరిశీలన చేసుకోవాలన్నారు. ఉద్దేశ్య పూర్వకంగా మైనార్టీకి చెందిన మహ్మద్ జానీని ఓడించడానికి ప్రయత్నించారన్నారు. పార్టీకి వ్యతిరేకంగా ఓటు వేయడంతో మైనార్టీలపై వారికి ఉన్న ప్రేమ బయటపడుతోందన్నారు. పార్టీ వ్యతిరేక ఓటు వేసిన వారు ఇప్పటికైనా పశ్చాత్తాప పడి భవిష్యత్తులో ఇలాంటి చర్యలకు పాల్పడకూడదని కోరారు.

విప్ ధిక్కరించిన ఎమ్మెల్యేలపై ప్రభుత్వ చీఫ్ విప్ మల్లు భట్టి విక్రమార్క సైతం ఆగ్రహం వ్యక్తం చేశారు. అభ్యర్థులు గెలుపొందేందుకు అనుగుణంగా ఓట్లు కేటాయించామని చెప్పారు. ముఖ్యమంత్రి కిరణ్ కుమార్ రెడ్డి మైనార్టీ అన్న సెంటిమెంటుతో ఓటు కేటాయించలేదన్నారు. మా అభ్యర్థులు క్రాస్ ఓటు చేశారనే సమాచారం ఉందని అన్నారు. మా పార్టీతో పాటు మిత్ర పక్షాల అభ్యర్థుల గెలుపుకు తగ్గట్లు ఓట్లు కేటాయించామన్నారు. టిడిపి ప్రజా సమస్యలపై చర్చించకుండా సభలో గందరగోళ పరిస్థితిని నెలకొల్పుతుందన్నారు. కాగా ముఖ్యమంత్రి అనుభవమే క్లిష్ట పరిస్థితులలో కూడా కాంగ్రెసును గెలిపించిందన్నారు.

Published On March 18, 2011