స్పీకర్ నామినేషన్ ఘట్టానికి డి శ్రీనివాస్ దూరం, చిరంజీవి హాజరు

హైదరాబాద్: శాసనసభ స్పీకర్, డిప్యూటీ స్పీకర్ పదవులకు నాదెండ్ల మనోహర్, మల్లుభట్టి విక్రమార్క నామినేషన్ల దాఖలు కార్యక్రమానికి ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ దూరంగా ఉన్నారు. స్పీకర్ పదవికి నాదెండ్ల మనోహర్, డిప్యూటీ స్పీకర్ పదవికి మల్లుభట్టి విక్రమార్క శుక్రవారం సాయంత్రం నామినేషన్లు దాఖలు చేశారు. ఈ కార్యక్రమానికి ముఖ్యమంత్రి కిరణ్ కుమార్ రెడ్డి, ప్రజారాజ్యం పార్టీ అధ్యక్షుడు చిరంజీవి హాజరయ్యారు. స్పీకర్‌గా మనోహర్ అభ్యర్థిత్వాన్ని బలపరుస్తూ కిరణ్ కమార్ రెడ్డి, చిరంజీవి సంతకాలు చేశారు. పలువురు మంత్రులు కూడా ఈ కార్యక్రమానికి వచ్చారు.

చాలా కాలంగా డిఎస్ ముఖ్యమంత్రి తీరుపై అసంతృప్తితో ఉన్నట్లు తెలుస్తోంది. వివిధ పదవుల పంపకాల విషయంలో ముఖ్యమంత్రి కిరణ్ కుమార్ రెడ్డి డి. శ్రీనివాస్‌ను సంప్రదించడం లేదని అంటున్నారు. కిరణ్ కుమార్ రెడ్డి ఏకపక్షంగా వ్యవహరిస్తున్నారనే విమర్శలు కూడా వస్తున్నాయి. పైగా, పిసిసి అధ్యక్ష పదవికి కూడా అభ్యర్థి ఖరారైనట్లు వార్తలు వస్తున్నాయి. ఈ నేపథ్యంలో డి. శ్రీనివాస్ అసంతృప్తి కారణంగా నామినేషన్ల కార్యక్రమానికి శాసనసభకు రాలేదని అంటున్నారు.

English summary

PCC president D Srinivas maintained distance to the nominations of Nadendla Manohar and Mallu Bhatti Vikramarka for speaker and deputy speaker respectively.