అసెంబ్లీలో కొత్త సంప్రదాయం: స్పీకరు, డిప్యూటీ పోటీలో టిడిపి

By Srinivas

Published: Friday, June 3, 2011, 14:53 [IST]

హైదరాబాద్: తెలుగుదేశం పార్టీ రాష్ట్ర అసెంబ్లీ చరిత్రలో కొత్త సంప్రదాయం తెరపైకి తీసుకు వచ్చింది. జూన్ 4న జరిగే సభాపతి, ఉప సభాపతి పోటీలో తాము కూడా నిలబడతామని తెలుగుదేశం అధ్యక్షుడు నారా చంద్రబాబునాయుడు శుక్రవారం అధికారికాంగా ప్రకటించారు. టిడిపి సీనియర్ శాసనసభ్యులు కెఇ కృష్ణమూర్తి, సుద్దాల దేవయ్యలను సభాపతి, ఉప సభాపతి పోటీలో నిలపనున్నట్లు ప్రకటించారు. ముఖ్యమంత్రి కిరణ్ కుమార్ రెడ్డి ప్రభుత్వం విశ్వాసం కోల్పోయినందునే తాము అవిశ్వాసం పెట్టడంతో పాటు సభాపతి పోటీలో ఉంటున్నామని చంద్రబాబు చెప్పారు.

అయితే 1956లో ఏర్పడిన ఆంధ్ర ప్రదేశ్ రాష్ట్ర చరిత్రలో ఇప్పటి వరకు ఏ ఇతర ప్రతిపక్షాలు కూడా సభాపతి పోటీలో తమ అభ్యర్థులను నిలపలేదు. గతంలో కాంగ్రెసు, టిడిపి ప్రభుత్వాలు పని చేశాయి. అయితే కాంగ్రెసు కానీ, టిడిపి కానీ విపక్షంలో ఉన్నప్పుడు సభాపతి పోటీలో నిలిచింది లేదు. కొన్ని సందర్భాలలో అధికార పార్టీ స్పీకరు అభ్యర్థిని వ్యతిరేకించినప్పటికి పోటీలో నిలిపింది మాత్రం లేదు. అయితే ఇప్పుడు టిడిపి అభ్యర్థులను నిలపడం ద్వారా రాష్ట్రంలో కొత్త సంప్రదాయానికి తెర లేపినట్లుగా కనిపిస్తోంది.

Published On June 3, 2011