దీక్ష విరమించిన రామ్‌దేవ్, ఫలించిన శ్రీశ్రీ రవిశంకర్ దౌత్యం

డెహ్రాడూన్: అవినీతికి వ్యతిరేకంగా చేపట్టిన దీక్షను యోగా గురు రామ్‌దేవ్ ఆదివారం విరమించారు. ఆర్ట్ ఆఫ్ లివింగ్ శ్రీశ్రీశ్రీ రవిశంకర్ దౌత్యం ఫలించింది. రామ్‌దేవ్ బాబా దీక్ష విరమించినట్లు రవిశంకర్ చెప్పారు. గత తొమ్మిది రోజులుగా బాబా రామ్‌దేవ్ దీక్ష చేస్తున్నారు. ఆరోగ్యం క్షీణించడంతో ఆయనను ఆస్పత్రిలో చేర్చారు. ఆస్పత్రిలో కూడా ఆయన దీక్షను కొనసాగించారు.

వివిధ ఆధ్యాత్మిక, మత నాయకుల సమక్షంలో రామ్‌దేవ్ బాబా దీక్ష విరమించినట్లు రవిశంకర్ మీడియా ప్రతినిధులతో చెప్పారు. బాబా రామ్‌దేవ్ దీక్ష విరమించారని, కానీ పోరాటాన్ని ఆపలేదని జనతా పార్టీ నాయకుడు సుబ్రహ్మణ్య స్వామి అన్నారు. అవినీతికి వ్యతిరేకంగా రామ్‌దేవ్ ఉద్యమాన్ని కొనసాగిస్తారని ఆయన చెప్పారు.

ఆదివారం ఉదయం బాబా రామ్‌దేవ్‌ను హర్యానా మాజీ ముఖ్యమంత్రి ఓం ప్రకాష్ చౌతాలా, పంజాబ్ ముఖ్యమంత్రి ప్రకాష్ సింగ్ బాదల్ కలిశారు. మత నాయుడు మొరారీ బాపు కూడా రామ్‌దేవ్‌ను పరామర్శించి, దీక్షను విరమించాలని సూచించారు.

English summary

In a major development, Baba Ramdev broke his fast here on Sunday, nine days after he went on hunger strike to campaign against corruption.