ముఖ్యమంత్రి పీఠం కోసం కాదు: డి శ్రీనివాస్

By Srinivas

Published: Thursday, July 21, 2011, 17:21 [IST]

హైదరాబాద్: ముఖ్యమంత్రి పీఠం కోసం ప్రత్యేక తెలంగాణ రాష్ట్ర ఉద్యమం జరుగుతుందనటంలో ఎలాంటి వాస్తవం లేదని మాజీ ప్రదేశ్ కాంగ్రెసు కమిటీ అధ్యక్షుడు డి శ్రీనివాస్ గురువారం విలేకరులతో మాట్లాడుతూ చెప్పారు. ముఖ్యమంత్రి పీఠం కోసం ఉద్యమం జరగడం లేదన్నారు. తెలంగాణ కోసం విద్యార్థులు, యువకులు ఎవరు కూడా ప్రాణత్యాగం చేసుకోవద్దని సూచించారు. తెలంగాణ విషయంలో ఇరు ప్రాంతాల నేతలు ఎవరూ రెచ్చగొట్టే వ్యాఖ్యలు చేయవద్దని సూచించారు.

కేంద్ర మంత్రి ప్రణబ్ ముఖర్జీ ప్రత్యేక రాష్ట్రాలు ఇవ్వడం ఇబ్బందికరమని చెప్పారని సీమాంధ్ర ప్రజాప్రతినిధులు చెప్పిన విషయాన్ని ప్రస్తావించగా వారికి ప్రణబ్ చెప్పారన్న గ్యారెంటీ ఏమిటని ప్రశ్నించారు. సీమాంధ్ర ప్రజాప్రతినిధుల వ్యాఖ్యలపై నమ్మకం ఏమిటన్నారు. తెలంగాణలోని ప్రజలంతా తెలంగాణను కోరుకుంటున్నారని అన్నారు.

Published On July 21, 2011